Batang Gilas sud quarterfinals sa FIBA Asia U18 Championship
CEBU, Philippines - Nakuha sa Batang Gilas ang krusyal nga daog pinaagi sa paglubong sa India, 105-82 aron moabante sa quarterfinals sa FIBA Asia U18 Championship sa miaging gabii didto sa Tehran, Iran.
Ang Gilas nagbitbit og 2-3 nga baraha human sa group stage nga nagtukmod kanila sa ikatulong dapit sa standing sa ilang bracket. Uban nila nga misud sa quarterfinals mao ang China ug Chinese Taipei.
Tungod kay nabutang sila sa katapusang luna sa Group A, ang Batang Gilas makigharong sa second placer sa Group B nga South Korea.
Sa ilang duwa sa India, si team captain Jolo Mendoza mipabuto og 23 puntos aron pangulohan ang Batang Gilas nga milabaw og 51-39 sa halftime sa wala pa sila molawig paingon sa kadaugan.
Si Kemark Carino mitampo og 14 puntos, samtang si Gian Mamuyac ug Fran Yu mitampo’g 12 puntos matag usa. (BANAT NEWS)
- Latest
