2nd edition sa “Who’s next?” Pro Boxing andam na

CEBU, Philippines - Andam na ang tanan alang sa ikaduhang edisyon sa “Who’s Next?” Pro Boxing Series nga gipasiugdahan sa Omega Pro Sports International inabagan sa 2016 Hyundai Tucson karong Sabado didto sa Robinsons Galleria Cebu atrium.

Sama sa nag-una nilang duha ka pasundayag, ang OPSI modalit na sab og eksplosibong aksiyon ngadto sa mga fans sa ilang double championship show nga pagabidahan nilang Jhack ‘Golden Boy’ Tepora ug Kenny Demecillo.

Si Tepora (17-0, 12KOs) modepensa sa iyang WBO Asia Pacific Youth super bantamweight title batok ni Bryan Capangpangan (10-2-1, 7KO), samtang si Demecillo (10-3-2, 7KOs) manalipod sa iyang bakus isip WBF Asia bantamweight champion batok ni Eugene ‘Rambo’ Lagos (8-1-2, 5KOs).

Sa supporting bouts, lain pang duha ka prospects ang iparada nga sila si knockout sensation Christian Araneta (12-0, 9KOs) sa Omega Boxing Gym ug kanhi Olympian Mark Anthony Barriga sa J.S. Promotions.

Masukod na sab ang abilidad ni Araneta  sa pakigharong niya sa beteranong si Charlie Cabilla (14-18-4, 2KOs) sa gipaabot nga dumot nilang rematch. Si Araneta midaog sa una nilang engkuwentro pinaagi sa TKO.

Samtang si Barriga, ang bugtong representante sa Pilipinas niadtong 2012 London Olympics, mohimo sa iyang pro debut batok ni Melvin Manangquil.

Mobanat sab sa maong card mao sila si Jimboy Haya batok Fabio Marfa, Feljun ‘Baby Face’ Taneo batok Lenmar Prescillas, TomJune ‘Warrior’ Mangubat batok Arnel Acebuque, Mark Vicelles batok Jesrel Corabal ug Marjun Piencenaves batok Andrei Navarro. (BANAT NEWS)