Pinoy eskrimadors misidlak sa WEKAF

CEBU, Philippines - Ang Pilipinas maoy midominar sa 14th World Eskrima Kali Arnis Federation (WEKAF) Championship ug literal niining gibagnos ang ilang mga kontra bitbit ang kinatibuk-ang medalya nga miabot ngadto sa 182 aron pag-angkon sa labing una nilang korona sud sa 16 ka tuig sa maong torneyo nga mahitabo kausa lamang sud sa duha ka tuig.

Human sa duha ka adlaw nga eksplosibong aksiyon didto sa J Centre Mall Convention Center sa Barangay Bakilid, Mandaue City, ang nasud, nga katapusang nakampiyon sa WEKAF niadto pang tuig 2000, way lalis nga miguwang kampiyon human nakahakot og 67 ka gold, 65 ka silver ug 50 ka gold medals.

"Just as what I've said earlier, this is our best chance to regain our throne," matud pa ni WEKAF chairman emeritus ug Supreme Grandmaster Dionisio 'Diony' Cañete. "All I can say is that I'm proud and happy that after 16 long years, we finally won the overall championship and what a sweet way to achieve it right here in the birthplace of this ingenious Filipino martial art."

Dominante kaayo ang mga Pinoy gumikan kay gilampurnas niini ang defending champion Team USA, nga nalabog sa ikaduhang puwesto uban sa ilang 41 gold, 29 silver ug 34 bronze medals.

Nahimutang sa ikaduhang puwesto ang Japan bitbit ang 22 golds, 12 silvers ug 15 bronzes ug gisundan kini sa Australia (12-5-13) ug Canada (10-10-11).

Naglangkob sa top 10 mao ang Hungary (8-6-11), Reunion Island sa France (6-11-13), Italy (3-3-5), United Kingdom (2-5-8) ug Liechtenstein (1-3-3).

Midugang og kahayag sa Pilipinas mao sila si Dexter Bolambao, Henry Talledo ug Sebastian Villanueva, nga nalakip sa listahan sa top 10 most bemedalled individuals.

Si Bolambao mipugnit og upat ka golds, usa ka silver ug upat ka bronze, si Talledo mibira og tulo ka golds ug duha ka silver, samtang si Villanueva nakamina og tulo ka bulawang medalya uban ang usa ka silver ug usa ka bronze. (EBV) (BANAT NEWS)