Nietes modepensa na sa iyang WBO Title
BACOLOD CITY, Philippines – Human sa estorya, kumo na maoy pasultion ni ALA Boxing Gym star Donnie ‘Ahas’ Nietes (37-1-4, 21KOs) sa pagdepensa niya sa iyang WBO light flyweight title batok sa Mehikanong si Raul ‘Rayito’ Garcia (36-3-1, 22KOs) sa main event sa “Pinoy Pride 36: A Legend in the Making” karong gabii dinhi sa University of St. La Salle Coliseum.
Si Raul kaluha ni Ramon Hirales Garcia nga gipilde ni Nietes pinaagi sa desisyon aron pagsakmit sa ikaduha niyang world title sa laing weight division lima ka tuig na ang milabay sa susamang binyu.
Bisan og wala siya nakita nga problema kay nasayod siya nga si Raul pareho ra og estilo sa inawayan ni Ramon, ang 33-anyos nga si Nietes nagkanayon nga lahi nga taktika ang iyang iladlad ning higayon.
Sila si Nietes ug Garcia parehong mitimbang og 108 ka libras atol sa weigh-in sa Robinsons Place Bacolod kagahapon timaan sa ilang kaandam sa ilang away.
Labaw sa iyang korona ug ingon dungog isip longest reigning Filipino world champion, si Nietes kinahanglan nga modaog aron dili madiskaril ang dakung oportunidad nga nagpaabot na kaniya.
Kini kay si Nietes kompirmado na man nga moaway batok ni Mexican star Moises Fuentes sa ikaduhang Pinoy Pride event sa ALA Promotions ug ABS-CBN Sports didto sa Amerika karong Septiyembre 24 didto sa StubHub Center sa Carson City, California.
Sa main supporting bout, si ‘King’ Arthur Villanueva (28-1, 14KOs) manalipod sa iyang WBO Asia-Pacific bantamweight title batok ni Juan ‘El Penita’ Jimenez (22-9, 15KOs) sa Mexico. (BANAT NEWS)
- Latest