Largo, Nocos, Suson sud Finals sa 21st JRG Gullas Tennis Cup
CEBU, Philippines - Ang pambato sa dakbayan sa Naga nga si Mitch Largo, Tiffany Nocos sa Lapu-Lapu City ug CJ Suson mao ang unang tulo ka players nga misulod sa final round sa 21st JRG Gullas Tennis Cup kagahapon didto sa Consolacion Tennis Club sa Barangay Laray, Consolacion, Cebu.
Si Largo misud sa finals sa unisex 10-under human sa usa ka dominanteng 4-2, 4-0 nga kadaugan batok ni Ian Lim. Si Largo magpaabot na lang sa modaog sa semifinals match tali nila ni Aaron Tabura ug CJ Suson aron maoy sangkaon sa finals.
Sa ilang bahin, sila si Nocos ug Suson magsangka sa girls 12 finals human gidispatsar ang tagsa-tagsa nilang kaatbang. Si Nocos mitagak ni Kiersten Albofera, 6-1, 6-4, samtang si Suson nakalingkawas sa higpit nga duwa batok ni Nicole Villar, 7-6, 7-6.
Si Elizabeth Abarquez misakiyo og duha ka luna sa semis pinaagi sa girls 18 ug girls 16. Sama ni Abarquez, si Patricia Velez miabante sa semis sa girls 16 human sa iyang 6-1, 7-3 nga kadaugan batok ni Shedel Gica.
Sa girls 14, si Ellaine Bahonsua midaog batok ni Nicole Villar, 6-3, 6-2 aron moduwa sa semifinals, samtang si Lyrah Repollo mipahilom ni Angelika Claridad, 6-0, 6-0. Si Wyne Paglinawan mipalagpot usab ni Shedel Gica, 6-2, 7-5.
Ang Palarong Pambansa silver medalist nga si Jose Maria Pague miabante usab sa semis sa boys 18.
Sa boys 14 semis karong adlawa, magsangka sila si Nilo Ledama ug Cesar Kristoffer Salimbangon, samtang si Brent Cortes moharong ni John Velez. (BANAT NEWS)
- Latest
