Perey hari sa masters event sa 17th Sinulog nat’l bowlfest
CEBU, Philippines - Si Edwin Perey sa Las Piñas City mao ang adunay katapusang bahakhak human iyang gilangkat ang titulo sa masters event sa 17th Sinulog National Open Bowling Tournament niadtong Domingo didto sa Gaisano Bowlingplex sa Barangay Banilad, dakbayan sa Sugbo.
Ang pambato sa Bowling Association of Las Piñas (BALP) mitapos sa 10-game final uban ang labing taas nga 2,108 puntos. Gawas sa tropeyo, mibulsa sab siya og P60,000 nga ganti.
Si Luke Bolongan sa BTA-UPHS alkansi lamang og 22 pins ni Perey aron pagtapos sa ikaduhang dapit, samtang si Clifford Tan sa BTA-Albert Surplus nalandig sa ikatulo sa iyang 2,057 pins. Ang nagsunod nga duha ka luna giangkon nilang Aui Padawan sa BTA-Prima (2,055) ug Vivian Padawan sa BTA-PSBC (2,039).
Naglangkob sa top 10 mao sila si Sal Bolongan (2,038), Wilbert Yu (2,029), Jules Pedrajas (2,015), Ruben Legorio (2,010) ug Art Gamolo (1,992). (BANAT PALARO)
- Latest
