UV Lancers abante sa finals

CEBU, Philippines - Nakuha sa University of the Visayas (UV)   Lancers ang mahinungdanong daog nga naghatag kanila og luna sa finals sa 1st Capt. Raul Cabanero Inter-collegiate basketball tournament.

Ang UV Lancers miiskor og ‘come-from-behind’ nga kadaugan batok sa USC Warriors, 75-70 sa crossover semifinals niadtong Domingo sa gabii didto sa Bulacao Sports Complex, dakbayan sa  Talisay.

Gipangulohan ni Rey Suerte ang UV Lancers human siya mituhog og 19 puntos. Si Jun Kent Manzo III mitampo’g 14 puntos alang sa UV nga maoy naggukod gikan sa pagsugod hangtod sa hinapos nga bahin sa fourth quarter.

Ang UV gibiyaan og nuybe puntos sa unang kuwarter, 13-22, apan napahakan ang labaw sa USC ngadto sa kuwatro, 48-52 paghuman sa third period. 

Naungot ang iskor sa USC  sud sa tulo ka minutos gikan sa pagsugod sa fourth period nga  gipahimuslan sa UV hangtod nga nailog ang labaw.

Si Manzo miposa’g tulo ka 3-pointers sud sa nahabiling kuwatro minutos sa duwa nga maoy  nakahatag og dakung danyos sa USC, kansang  misihag nga kadaugan nahanaw.

Upat ka players sa USC ang miiskor og double figures pinangulohan ni Charles Pepito nga  miantog og 18 puntos.

Ang UV nagpaabot na lang sa modaog sa duwa tali sa USJ-R Jaguars ug J. Espina Wildcats nga  padayong nag-ilog sa katapusang luna sa finals ning pagsuwat gabii.

Sa inter-sitio division ning maong liga nga nahimo  ubos sa paningkamot ni Bulacao Brgy. Capt.  ug Talisay City ABC president Raul Cabanero, ang sitio Villabusca nakaipsot sa kulbahinam nga duwa batok sa sitio Villaberna sa iskor nga 70-69.

Ang mga duwa gidumala nilang konsehal Banjo Abastillas, Darwin Cabanero ug Agnes Lastimosa inabagan sa Bulacao Barangay Council ug SK Task Force ug ingon man sa CEBRA  pinangulohan ni CESAFI senior referee Edwin Dejacto Sr. (BANAT PALARO)