Hontiveros miluwas sa Gilas

CEBU, Philippines - Gipakita ni Cebuano hotshot Dondon Hontiveros nga angayan siya nga malakip sa national team human niya giagak ang Gilas Pilipinas ngadto sa 92-88 nga kadaugan sa overtime batok sa New Zealand sa 37th William Jones Cup kagahapon didto sa Xinzhuang Gym sa New Taipei City, Taiwan.

Ang 38-anyos nga PBA veteran kalit lang mibuto sa overtime period human siya mihimo og 11 sa iyang 21 puntos nga maoy nahimong yawi alang sa ikaupat nga kadaugan sa Gilas sud sa unom ka duwa.

Apan si Jayson Castro maoy nangu sa Gilas sa iyang 22 puntos,   samtang ang laing beterano nga si Asi Taulava  miabuno’g 13 puntos.

Sa maong kadaugan, ang Gilas nakapuwersa ngadto sa four-way tie sa ikaduhang dapit uban sa South Korea, Russia ug Chinese Taipei sa managsamang 4-2 win-loss records.  Ang Iran maoy nag-una sa standing sa ilang 5-1 nga baraha.

Pirmeng naggukod ang Gilas tungod sa presensiya sa 7-footer nga si Bryan Davis, kinsa wala kapugngi sa opensa  aron hatagan ang New  Zealand og 59-52 nga bentaha.

Apan ang Gilas  wala mawad-i sa paglaum ug nalagsik kini dihang  si Castro mihimo’g pito sa 10-2 run nga nakapapas sa labaw sa New Zealand ug nakatabla pa, 72-all sa nahabiling tres minutos sa duwa.

Ang New Zealand miposa’g upat ka sunod-sunod nga puntos, apan sila si Taulava ug Castro mipasud sa ilang mga tirada aron tablahon pag-usab, 76-all.

Nagbuntaog na unta sa kadaugan ang New Zealand human moabante, 78-76 sa katapusang 31 segundos sa regulasyon, apan napatabla kini ni Castro pinaagi sa iyang lay-up, 78-all sa nahabiling 19 segundos nga naghatod sa duwa ngadto sa overtime.

Sa dugang singko minutos, si Dondon Hontiveros mao na ang misalida diin miposa siya’g tulo ka triples. Ang iyang ikatulong three-pointer  ug ang usa ka free throw ni Castro maoy nakapaabante sa Gilas, 88-84 sa nahabiling uno minuto sa overtime. 

Sunod harungon sa Gilas mao ang US Selection karong alas-5 sa hapon.