Guiao milaban ni Pacquiao

CEBU, Philippines – Daghan ang wala makauyon sa pagsud ni Manny Pacquiao sa PBA apan taliwala sa mga pagsaway nga iyang nadawat, dunay usa ka tinamod ug respetadong personalidad nga nanalipod ug midapig kaniya.

Si Rain or Shine head coach Yeng Guiao nagkanayon nga wala siya'y nakitang dautan sa pag-entra ni Pacquiao isip usa ka propesyonal nga basketbolista.

Alang ni Guiao, makaayo pa gani kini sa liga kay isip boxing superstar, daghan og fans si Pacquiao nga seguradong malingaw sab motan-aw kaniya nga mowadwad sa iyang abilidad sud sa korte.

Gihulagway pa gani ni Guiao si Pacquiao nga sama sa usa ka lamas nga nagpahumot ug nagpalami og maayo sa labing karaan nga liga sa Asya kun pro basketball maoy hisgutan.

"Overall, it's healthy because it's something that the fans enjoy - to see Pacquiao not just fighting but also playing basketball and coaching it," batbat pa ni Guiao sa dihang nahinabi sa GMA News Online. "It adds to the spice of the league," dugang pa ni Guiao, nga sama ni Pacman usa sab ka kongresista nga nagrepresentar sa unang distrito sa Pampanga.

Hinoon miangkon si Guiao nga bisan og makadani og dakong interes sa liga si Pacquiao, dili gyud kalikayan nga mapiksan og kotrobersiya ang iyang pagduwa sama ning bag-ohay pang nahitabo nga may kalambigitan sa import sa Purefoods Hotshots nga si Daniel Orton.

Human sa ilang kapildihan batok sa Kia Carnival diin si Pacquaio playing coach, ang dismayadong si Orton namahayag nga pagduwa ni Pacquiao sa PBA usa ka dakong bugal-bugal. Gumikan sa maong malaha nga komentaryo, si Orton gipamulta sa liga og P250,000 gawas nga gitagak kini isip Purefoods import.

"There's certainly a lot more interest, and some controversies like 'yung kay Daniel Orton," dason pa ni Guiao.

Sa laing bahin, si Pacquiao milupad na sa Amerika niadtong Sabado sa gabii aron didto ipahigayon ang iyang training camp alang sa gikahinaman niyang away batok ni Floyd Mayweather, Jr. karong Mayo 2 didto sa MGM Grand sa Las Vegas.

Si Pacquiao gibana-bana nga mokita og dili mominus sa $80 million kon P3.5 billion wa pay labot ang iyang bahin sa halin sa pay-per-view sa maong superfight nga way lalis maoy labing dako nga event sa kasaysayn sa boksing.  — gikan sa GMA News (BANAT NEWS)