Cebu-Leyte PBA games andam na
CEBU, Philippines – Gibutyag ni event organizer Van Halen Parmis nga hitsas na ang skedyul sa gipaabot nga Cebu-Leyte Cup, usa ka charity basketball event alang sa mga biktima sa bagyong Yolanda. Ang upat ka adlaw nga basketball event magsugod sa Septiyembre 24 ngadto sa 28.
Ang torneyo nga salmutan sa tulo ka PBA teams nga mao ang Meralco Bolts, Barako Bull Energy Cola ug Barangay Ginebra San Miguel mosikad sa Septiyembre 25 didto sa Hinundayan gym sa Southern Leyte.
Sangkaon sa Brgy. Ginebra Kings ang Goldstar Hardware sa Davao City sa alas 6 sa gabii, sundan sa sangka tali sa Barako Bull ug Samsam Gullas-Panalay Tailoring sa main game sa 7:30 p.m.
Sa musunod nga adlaw, ang Samsam Gullas team makigharung sa Goldstar, samtang ang Barako Bull ug Ginebra na usab ang magduwa sa main game. Ang tickets nagkantidad og P250 sa upperbox, P500 sa ringside ug P1000 sa VIP seats.
Sa Septiyembre 27, ang aksyon mutapon didto sa Minglanilla, Cebu dihang magharung pag-usab ang Samsam Gullas team ug Goldstar sa alas-7 sa gabii, sundan sa duwa sa Meralco ug Barako sa alas-8:30 sa gabii.
Ang katapusang adlaw sa torneyo ipahigayun sa Mandaue City Cultural Sports Complex diin unang magsangka ang Barako Bull ug Goldstar sa alas-4 sa hapon, samtang ang Meralco ug Ginebra magtigi sa main game sa alas-6 sa gabii. Ang koponan nga adunay labing daghan og daog maoy ideklarar nga kampiyon.
Ang mga tickets nagkatintidad og P150 sa upperbox, P250 sa stage, P500 sa ringside sa Minglanilla ug P200 sa upperbox, P400 sa stage , P500 sa lowerbox ug P700 sa ringside sa Mandaue games.
Makapalit og tickets didto sa New Reroma Pharmacy sa Poblacion Ward 1 sa Minglanilla, Bigstart Travel assistance sa Robinsons-Talisay, Cebu Coliseum, ug The Old Spaghetti House sa SM City-Cebu. (BANAT NEWS)
- Latest
