Upsets sa NBA playoffs

Mao pa la'y pagsugod sa NBA playoffs ug daghan pang mahitabo sa mga mosunod nga mga duwa.

 Apan sa pagka-karon, duna gyu'y basihan ang mga pangagpas sa uban nga dili gyud makasustinir ang Indiana Pacers ug dili ang pagka-No. 1 maoy sukdanan sa ilang kalig-on kay kung mapilde man lang gani sila'g No. 8 seed nga Atlanta Hawks, 101-93, unsa man kaha'y sarang nilang ikasukol sa two-time defending champion nga karon No. 2 seed Miami Heat.

 Dili sab hinuon katingad-an kun ang topseed ma-upset sa lower seed kay mao gyud kana ang duwa – adunay mapilde ug duna say modaug, lig-on ka man o dili.

 Gani nahitabo na kini sa Seattle Supersonic batok Denver Nuggets niadtong 1st round sa playoffs sa tuig 1994. Ang No. 1 seed sa West nga kanhi Seattle Sonics (63-19) nilang Shawn Kemp ug Gary Payton gitagak sa Denver Nuggets (42-40) nilang Dikembe Motumbo ug LaPhonso Ellis. Napilde ra sab hinuon ang Nuggets sa second round batok sa Utah.

 Sa unang adlaw sa playoffs, nabihag dayon ang No. 3 Toronto Raptors sa Brooklyn Nets, 94-87 human lang sila makahimo'g franchise record nga 48 ka daog. Mao sab gihapon ang gidangatan sa No. 3 sa West ang Los Angeles Clippers nga gipakuratan sa No. 6 Golden State Warriors, 109-105.

 Bugtong ang Oklahoma City Thunder maoy topseed nga midaog sa ilang homecourt niadtong Lunes, 100-86 batok sa No. 7 Memphis Grizzlies. Tam-is kaayo kadtong unang daog tungod kay nakabawos dayon ang Thunder sa Grizzlies nga maoy nagtagak kanila sa second round sa playoffs sa miaging tuig. Hinuon, niadtong tungora, napiang na si Russell Westbrook human palagpota sa Thunder ang Houston Rockets sa first round.

 Sa ikaduhang adlaw sa playoffs, lain na sab nga makapakurat nga kapildihan sa seeded teams dihang miyukbo ang Houston Rockets batok sa Portland TrailBlazers sa overtime, 122-120 ug midaog ang Washington Wizards batok sa Chicago Bulls, 102-93.

 IBAKA. Matag attempt nga matapalan ni Serge Ibaka adunay tugbang nga $500 ug ang matigum iyang ihatag ngadto sa mga kabus niyang kaigsuonan didto sa nasud sa Congo, Africa. Ug sa iyang upat ka tapal sa Game-1 batok Memphis, aduna na siya'y ihatag nga $2,000. Bulahan ang taga-Congo tungod kay segurado akong daghan pang block shots ang mahimo ni Ibaka ilabi na kay usa siya sa labing maayong post defender sa NBA.

  MISCELLANEOUS. Belated birthday greetings to my godson Renz Karl P. Narvasa a.k.a. Choi-choi and to my colleague in TV5/Radyo Singko Dennis Tanoc last April 9 and April 14, respectively.