EDITORYAL - Kurapsyon Wagtangon?

Milingkod na sugod kagahapong adlawa ang bag-ong regional director sa Land Transportation Office (LTO) dinhi sa Central Visayas. Tinguha gyud unta ni RD Vic Caindec nga mawagtang ang kurapsiyon diha sa ahensiya nga iyang pagadumalahon.

Apan samtang dako kaayo ang iyang tinguha nga mahanaw na ang kurapsyon sa LTO, wala gayud siya maniguro nga iya kining mahimo atol sa iyang katungdanan. Giangkon ni Caindec nga dili kini niya mahimo nga mag-inusara, ug nagkinahanglan siya sa abag sa katawhan.

Unsaon? Kinahanglan nga ang mga tawo nga gustong pangilkilan sa mga opisyal ug kawani sa LTO, kinahanglan nga moabag pinaagi sa pagtug-an niini ngadto kaniya. Wala malilong sa kadaghanan nga ang LTO usa sa mga ahensya sa kagamhanan nga giingong daghan ang mga corrupt.

Subo lang hunahunaon kay ang ubang mga tawo nga panguwartahan sa pipila ka kurakot nga kawani sa LTO, dili gyud moreklamo kay boluntaryo man gani sila nga motunol og dakong kantidad, aron dili gukdon ang ilang mga ilegal nga kalihukan.

Usa ka kompaniya sa mga bus nga nag-operate dinhi sa Sugbo ug ubang bahin sa rehiyon, giingon nagtinil og mga sakyanan nga “kaluha.” Nagpasabot nga usa ra ang rehistro, usa ra ang prangkisa, usa ra ka “set” ang plate numbers, apan duha ka sakyanan ang nagdagan.

Ang orihinal nga plaka sa sakyanan, makita nga anaa gipapilit sa atubangan nga bahin, ug sa luyo sa sakyanan binuhat ra nga plaka ang gipapilit. Ngano nga ingon man niini? Ang tubag mao nga tua sa lain nga sakyanan gigamit ang laing orihinal nga plaka.

Angay’ng susihon ni Caindec nga ang maong mga kolurum nga bus, migamit usab og mga makina nga gitamper ang engine ug chassis numbers aron nga kon madisgrasya, motukma ang numero niini sa papeles sa LTO ug LTFRB.

 Dili malalis nga bug-at kaayo ang gipas-an karon nga tahas ni Caindec kon gusto man gyud niya nga masumpo ang mga binuang sa ubang transport operators nga kakonsabo sa pipila ka opisyal sa LTO.