EDITORYAL - Nganong kalit girelibohan?

Daghan ang nakurat sa kalit nga pagrelibo kang Police Regional Office-7 director Jose Mario Espino isip labaw’ng opisyal sa kapolisan sa rehiyon, nga gipatuman pipila na lang ka adlaw sa dili pa ang Sinulog. Wa ibutyag kon unsa’y rason sa pagrelibo kaniya, apan makapangutana gyud ang publiko kon nganong relibohan siya tulo na lang ka adlaw sa dili pa ang labing dakong selebrasyon sa Sugbo.

Siya maoy nagplano sa preparasyon sa seguridad ug dako man unta ang iyang papel alang sa kasigurohan sa mga tawo nianang panahona.

Ang Philippine National Police (PNP) headquarters sa Camp Crame mimando sa pagrelibo ni Espino apil ang 12 pa ka opisyal sa kapolisan dinhi sa Sugbo.

Si Espino gimandoan pag-report ngadto sa PRO-10 sa Northern Mindanao “as soon as possible via shortest route by any means of transportation.” Ingon niini kakusog ang kamandoan, sa ato pa kinahanglan nga mawagtang dayon siya dinhi sa Central Visayas sa labing dali nga panahon. Ang hulip kaniya mao si Chief Superintendent Robert Quenery gikan sa Cagayan Valley region.

May koneksiyon ba kini bahin sa suwat nga gipadala sa usa ka “anonymous sender” nga adunay mga seryusong akusasyon batok kang Espino ug sa iyang kapikas? Ang nagsuwat, mura’g klaro nga adunay daghang nahibaw-an sa kalihukan sulod sa PRO-7, o ba kaha konektado gyud siya diha sa PRO-7 nga misumbong bahin sa mga binuhatan sa maong heneral.

Wala pa’y tuig si Espino dinhi sa rehiyon kay niadto lang Hulyo 17 siya milingkod puli kang Chief Supt. Noli Taliño, kinsa mao na karon ang hepe sa PNP Special Action Force (SAF). Dili ikalimod nga nahimong isyu dinhi sa rehiyon ang kabahin sa mga alegasyon nga si Espino nagdawatan og payola gikan sa gambling lords.

Ang heneral kusganong mihimakak sa mga pasangil kaniya ug mihulagway nga pagpangdaot lang kini sa iyang pangalan kay adunay interesado sa iyang pwesto.