EDITORYAL - Angay’ng ikiha gyud

Ang pagdaog sa dancing contingents sa Barangay Apas, dakbayan sa Sugbo nga gidumala sa Barangay Mayor’s Office (BMO) makahaw-as ba sa sayop nga nahimo sa  mga lider nga nag-solicit og kuwarta sa mga magpapatigayon nga walay pagtugot?

Nakontrobersiyal ang mga sakop sa BMO sa Barangay Apas diha nga nabulgar nga nang-solicit diay sila og kuwarta sa kantidad nga P100,000 ngadto sa P1million aron gamiton sa mga gastuhanan sa pagsalmot nila sa Sinulog sa Kabataan.

Bisan gani si Mayor Tomas Osmeña wala makagusto nga ang BMO sa Apas migamit sa logo sa Cebu City Hall sa ilang solicitation letter nga gipadala sa mga dagkong magpapatigayon. Tungod sa kadako sa gipangayo, dunay mireklamo.

Nanganti gyud ang barangay kapitan sa Apas nga iyang ikiha sa hukmanan ang tulo ka tawo nga maoy nagdumala sa BMO sa iyang barangay, kay matud niya kwestyonable kaayo ang ilang gihimo.

Tinuod, sipyat gyud ang nagdumala sa BMO sa Apas kay deritso ra man sila og pang-solicit og kwarta gikan sa mga magpapatigayon. Dili kalikayan nga duna gyu’y magduda kon unsaon nila paggasto ang kuwarta nga ilang makolekta.

Ang pagpasaka og kaso batok sa mga tawo nga responsable sa pagpadala og solicitation letter, angay gyud nga himoon aron nga magpanuko kadtong uban nga pagka karon nagplano usab nga mohimo og susama nga kalihukan.

Dili imposible nga adunay mga magpapatigayon nga mapugos gyud paghatag og kuwarta kon pangayoan sa mga tawo nga magpatuo nga konektado sila sa City Hall sa kahadlok nga kasuk-an kon dili mohatag ug basin apikehon ang ilang negosyo.Kon dili kini tagdon, ug dili tudloan og leksiyon ang mga hingtungdang BMO diha sa Apas, posible nga mosundog ang uban sa laing mga barangay. Dali ra kaayo ang panguwarta pinaagi niini kon ilang himoon.