Kuwang sa kagamitan

Unsa kaandam ang Bureau of Fire Protection ug ang mga Local Government Units (LGU) sa pagpawong sa sunog sa mga dagko ug tag-as kaayo nga edipisyo?

Kini nga pangutana, dugay na kaayo, diin ang tubag tataw usab nga dili pa andam ang kabomberohan sa pagkombati sa sunog, diha sa mga high-rise buildings kay kuwang sila og kahimanan.

Sama sa nahitabong sunog sa usa ka dakong mall sa dakbayan sa Sugbo diin napalong ang kayo human sa  tulo ka adlaw nga pagkombati sa mga bombero. Dili gani taas kaayo ang edipisyo apan naglisod gyud ang kabomberohan.

Sa mga residential area, moabot lang og 30 minutos hangtud na sa usa ka oras ang sunog, usa nila mapalong, apan sulod nianang mga orasa daghan na nga panimalay ang naugdaw. Himoon dayong rason ang hagip-ot nga agianan, kay tinuod man usab apan sa nahitabo sa dakong mall, naklaro gyud ang dakong kakulangan sa kagamitan sa BFP.

Wala’y kwestiyon sa katakus sa mga bombero kay mosungasong man gyud bahala og magkalisud, basta mahimo lang nila ang ilang responsibilidad.

Ang mga ekipo sa BFP nakadesinyo pa kaniadtong wala pa’y mga higanteng building, o dili pa kaayo malambuon ang Metro Cebu, o kaha alang ra sa mga panimalay. Lahi na kaayo karon kon itandi kaniadto. Samtang kinahanglang palambuon ang katakus sa mga bombero, angay usab nga mapalambo ang kagamitan mismo.

May mga firetruck na nga naa’y hagdanan, apan kutob ra man tingali na 3rd floor kon wala ko masayop, ug limitado ra usab kaayo. Wala’y kapuslanan ang mga fire drill kay lahi ra kaayo kon anaa na gyud sa actual nga panghitabo.

Panahon na nga mopalit og kagamitan ang BFP, inabagan usab sa mga LGU, og kon gikinahanglan ang mga dagkong negosyante, moabag usab unta. Bisan pa man sa limitadong resources apan nagmalampuson gihapon ang BFP sa pagpawong sa sunog.

Saludo gihapon kita sa mga bombero nga mihimo sa ilang trabaho bisan og nag-ungaw sila sa peligro.