EDITORYAL - Dura Lex Sed Lex

Angay ba nga pasakaan og kaso kadtong dalagang tinun-an nga nakahasol sa kapolisan human kini nagpatuo nga gidagit siya og mga lalaki nga mipugos kaniya pagpasakay sa usa ka van kaniadtong Lunes sa buntag?

Dili malalis nga ang gihimo sa maong tinun-an nakapasakripisyo gyud sa mga polis, sa media, ug sa ginikanan sa mga tinun-an nga nabalaka kay basin og mabiktima usab sa pagpangidnap ang ilang mga anak. Daghang ginikanan, kang kansang mga anak, kaklase sa maong tinun-an ang miadto gyud sa ilang tunghaan tungod sa grabeng kabalaka sa giingong pagpangidnap.

Apan sa imbestigasyon, nahibaw-an sa kapolisan nga drama ra diay sa tinun-an nga siya gidagit sa lima ka lalaki, ug kuno gipugos siya pagpasakay sa usa ka van ug gidala sa bukid.

Nakadispalko ra diay ang maong tinun-an og gamay’ng kantidad nga halin sa libro nga gipiyal kaniya sa iyang maestra, ug maoy nakaproblema niya ug nakapahukom nga magpatuong gikidnap.

Dunay misugyot nga imbes nga ikiha ang maong tinun-an, angay pa gani nga tabangan kini pagsulbad sa iyang problema. Tinuod, pobre ang maong tinun-an kay working student man gani siya sa tunghaan.

Apan ang direktor sa kapolisan dinhi sa dakbayan sa Sugbo nga si Senior Superintendent Joel Doria gusto gyud nga ikiha ang maong dalaga aron pagtudlo kaniya og leksiyon nga dili maayo ang iyang gihimo. Kon himoon sa kapolisan ang pagkiha sa maong dalaga, mahimong mosamot ang iyang problema, nga labaw pa sa P4 mil unta niyang bayranan sa nadispalko niyang kuwarta.

Husto si Doria nga ikiha gayud ang dalaga kay aron ang iyang binuhatan dili sundon sa uban nga magtuo nga mayama-yamaan ra ang balaod.

Adunay panultihon nga Latin nga nagkanayon, “Dura Lex Sed Lex” nga nagpasabot, The law may be harsh, but it’s the law.