Hospital gikiha

Sa Butuan City ni. Maayo unta kon mahimo usab kini dinhi sa atong lalawigan ug dakbayan sa Sugbo. Gumikan sa pagbalibad o sa dili pagpa-admit sa pasyente, usa ka tag-iya sa hospital ug laing duha, ang gipasakaan og sumbong criminal.

Mipasaka sa sumbong ang City Prosecutor’s Office nga matud dinhi, “has found probable cause to file charges.” Dungan sa tag-iya sa hospital, gikasohan usab ang supervisor ug usa ka staff sa hospital. Ang pasyente, usa ka batang babaye, nagpanuigon og 10, may sakit sa kasingkasing, diabetes, ug sa kidney, wala dawata sa hospital kay P10 mil ra ang kwarta sa mga ginikanan, ug ang demand sa hospital, P30 mil deposit. Namatay ang bata.

Unsa’y aksyon sa Department of Health? Paggawas sa balita, naghuwat pa ang DOH sa reklamo sa mga ginikanan sa bata. Dinhi ra kutob ang atong kasayoran.

Ang balaod 8344 nagdili sa mga hospital pagpangayo og deposit o advance payment gikan sa mga pasyente, ilabi na kon grabe ang kahimtang niini.

Dinhi sa ato, daghan na ang atong nadunggan nga mga pasyente ang gibalibaran sa hospital gumikan sa kapakyas pag-put up og deposito. Aduna na ba’y gikiha gumikan ning maong kalapasan sa balaod?

* * *

It seems nga madayon na pud ang BRT Project, tungod kay ang gisugyot paghimo’g kausaban sa mga plano niini, magkinahanglan na pud og dugang feasibility study ug laing approval sa NEDA ug ubang concerned agencies … busa mosamot kalangan ang maong proyekto.

Akong tan-aw, kon kini dili lang sambogan sa politika, dugay na unta kining gisugdan ug gi-implementar. Sa mga feasibility studies nga gihimo, feasible man gyud ang maong proyekto, ug kadaghan na kini maaprobahi sa NEDA ug sa lending institution nga mopahulam kanato sa gikinahanglang kwarta.

Busa, alang sa mga misupak niini, ayaw lang ibutang sa inyong hunahuna nga proyekto kini ni Mayor Tomas Osmeña, kon dili, proyekto kini natong mga Sugbuanon.

Bisan si kanhi Mayor Mike Rama miuyon man niini, ug hinaot nga ang kadagkoan sa Manila, mo-focus pagpadayon niini ug dili magpadala sa mga politikanhong intriga sa highly politicized Cebu City.

* * *

Tinuod, ang ligid sa  mga hauler truck magbilin og lapok sa kadalanan, ang uban niini mga gagmay’ng bato maka-pose og danger sa mosunod niini.

Panahon na nga we put a stop to this shenanigans. Klaro kaayo nga pangabuso. Hinaot nga mapasar ang Provincial Mud-Free Highway Ordinance nga gipasaka nila ni PB Members Thadeo Jovito Ouano ug Sun Shimura.