Sihag nga lit-ag para ni Junjun O

Duha lang ka butang ang mosantop sa akong hunahuna kon idayon ni Mayor Tomas Osmeña ang paghatag og “executive function” kang Junjun Osmeña, ang gitudlo ni Presidente Rodrigo Duterte nga hulip kang kanhi konsehal Hanz Abella nga nagpa-appoint sa National Labor Relations Commission. Una, politika. Ikaduha, lit-ag.

Human matudlo si Abella sa NLRC, nahimong minoriya ang Bando Osmeña Pundok Kauswagan ug maglisod ang kampo sa mayor pagpalusot sa ilang mga agenda nga wala’y pagsupak sa oposisyon nga maoy nagmayoriya sa konseho. Busa kon gusto nilang adunay “likoy” sa oposisyon nga mopabor nila, maayo na kaayo na para sa BOPK.

Nahimo na nila kini. Kana si Konsehal Dave Tumulak dili man BOPK sa eleksiyon kaniadtong 2016. Gikamang sa kampo ni Konsehal Margot Osmeña ug gisaraan. Tungod sa taas nga ambisyon sa politika ni Dave, gihudas niya ang iyang Team Rama bugti sa polis-polis nga function.

Nagtuo tingali si Tomas nga kon iyang hayloon si Junjun Osmeña nga parehason kang Dave, molikoy kini pabor sa BOPK. Anaa ra hinuon kana ni Junjun. Ning higayona masukod ang loyalty ni Junjun ug pareho ba sila ka-hudas sa kanhi niya kauban sa Team Rama nga si Dave.

Bisan si Tomas nasayod nga si Junjun Osmeña natudlo ni Duterte pagka-konsehal tungod kay si presidential assistant for the Visayas Mike Dino ang nangugat didto sa Office of the President nga siya ang ihulip kang Hanz Abella.

Makaduha nag-lobby si Mike Dino ngadto kang Duterte. Una, aron matudlo si Hanz sa NLRC, ug ikaduha, mahulip si Junjun Osmeña. Sa pagkakaron, dili hinuon ko motuo nga molikoy si Junjun Osmeña. Ang iyang igsuon napangasawa sa igsuon ni Mike Dino.

Usa pa, si Junjun Osmeña anak ni anhing bise mayor Renato Osmeña. Apan sa pagkamatay sa iyang amahan, si Tomas mismo ang mi-discourage ni Junjun nga dili mag-apil-apil sa politika, tingali sa kahadlok nga adunay laing Osmeña nga mosulbong ug malupigan ang iyang anak nga si Miguel, kang kansang batasan wala hiuyoni bisan sa mga sirkulo ni Tomas.

Ug mao kini ang hinungdan nga sa eleksiyon sa 2016, didto sa Team Rama mikuyog si Junjun Osmeña. Lain nakong pagtuo nga usa ka lit-ag kining tanyag ni Tomas nga executive function kang Junjun Osmeña nga kon adunay sayop, kini maoy gamiton batok niya.

Kon dili magbantay si Junjun Osmeña, aw, kining executive function nga tanyag ni Tomas magsilbe kining pisi nga ihikot sa iyang liog. Nasayod man kita nga kanang “deputation” sa mga konsehal nakalapas kana sa balaod. Hilig ang mayor niini, sama sa kaso sa Angkas ug Uber nga iya gyud ipamugos nga kon magka-letse-letse, dili man siya ang maapeke.