Disiplina sa katawhan

Gipatuman sa Cebu City ang Discipline Zone sa pinili nga mga dapit sa dakbayan diin kinahanglan gyud nga motuman ang tanan kon unsa ang nalatid sa balaod.

Maayo kini nga lakang sa dakbayan aron madisiplina ang mga tawo nga walay pagtagad sa gipatuman nga mga lagda, nga magpataka lang og himo sa ilang gusto.

Apan molungtad kaha ni? Basin kutob lang kini sa sinugdanan kay dili masustinahan? Hinoon sa kamot ni Raquel Arce sa PROBE, mura’g pangulbaan ang mga violators kay dili man gyud sila santoson niini.

Anugon kon nganong dili man tibook dakbayan ang gipaubos sa discipline zone, mas maayo nga matisok sa alimpatakan sa katawhan ang disiplina bisan asa ka nga dapit moadto.

Maayo kining programaha, apan huyang ra kay mas lapad man ang mga dapit nga pwede ra diay nga dili kaayo higpit ang pagpatuman sa balaod.

Himoon nako nga sanglitanan ang Mandaue City nga sinugdanan napuno sa pagsaway tungod sa kaestrikto sa pagpatuman sa mga lagda.

Sa lagda sa trapiko, walay gisanto bisan mismo kadugo sa mayor ug mga traffic enforcer mismo gipahamtangan ug silot kay nakalapas man.

Ang pag-ban sa paggamit ug plastic nga gisupak unta sa mga tawo, ilabi na kadtong mangompra sa merkado.

Ang mga sidewalk, gihawanan sa mga vendors nga misangpot pa sa rally atubangan sa City Hall.

Apan nakita karon sa katawhan ang positibong resulta sa estriktong pagpatuman sa balaod nga nagbunga og disiplina.

Ingon usab niini ang mahitabo sa Cebu City kon dili magpanuko ang mga opisyal sa pagdisiplina sa mga tawo nga badlongon.