Unsa man g’yud?

May nahinumdoman ko, ug maka-relate ko sa pagtudlo sa among professor kaniadto sa major subject  namo nga‘International Law sa kurso nga Bachelor of Arts Major in Political Science sa Southwestern University, sa bag-o lang nga pamahayag ni Presidente Rodrigo Duterte nga ang America gihapon ang best friend sa Pilipinas.

Sa iyang lektyor, gihatagan niya og gibug-aton ang trabaho sa ambassador. Nakapatingkag kadto sa akong dunggan mao nga wala g’yud ko makalimot sa iyang paghulagway sa kinatibuk-an sa trabaho sa usa ka ambassador.

Ingon siya, ang ambassador “is a good man telling a lie for his country.” Wa ko kasabot sa gisulti sa among professor. Nagsumbagay sa akong huna-huna ang mga pangutana kon unsaon pagka maayong tawo sa usa ka bakakon.

Ang gihatagan nako og gibug-aton sa akong pagsabot sa pamahayag sa among professor mao ang pagkatawo sa ambassador ug dili ang iyang gihimo mao nga lahi ang akong pagsabot sa gipanulti sa among professor kanamo.

Hinuon sa tanto niya nga pagpasabot, ug sa hinay-hinay usab nako nga pagsabot, nasabtan ra g’yud nako ang buot niyang ipasabot nga ang ambassador maayong tawo nga mamakak para sa kaayohan sa iyang nasud.

Mao kini ang hinungdan ngano nga wala na ko matingala sa gipamahayag ni Presidente Duterte nga friend gihapon sa Pilipinas ang Amerika sa wala pa sila magkita sa presidente niini nga si Donald Trump.

Kini bisan pa man sa iyang pagpamalikas ug paghingilin sa Amerika kay ang China ug Russia na ang iyang mga bag-ong higala. Ako man gud nga gisabot nga kon ang ambassador maayong tawo nga mamakak para sa kaayohan sa nasud, unsa pa kaha ang presidente.

Kon mamakak man gani ang ambassador para sa kaayohan sa nasud, ang presidente pa kaha nga siya g’yud ang pangulo sa nasud? Mr. President, unsa man g’yud? Friend pa ba g’yud nato ang Amerika, o sakay-sakay lang sa panahon ning imoha?