Angkas maghari na sa karsada

Dihang nagsakay ko og taxi padulong sa airport kagahapong adlawa, nagpahungaw sa iyang sentimento ang taxi driver nga gamay na lang kuno ang iyang ma-take home nga kuwarta tungod sa kanihit sa mga pasahero, pun-an pa sa grabe kaayo nga traffic karon sa Metro Cebu. Apan ang numero uno nga hinungdan nganong nigamay ang iyang kita, mao ang daghan na kaayo nilang kompetensya. Nag-una niini ang Uber ug ang Grab nga mao kuno ang first priority, ilabi na sa mga sosyal nga pasahero.

Apan lakip usab diay ang pagtumaw karon sa Angkas, nga matud pa niya, gipasosyal nga habal habal. Nabatyagan na usab sa mga taxi ang epekto niining matang sa alternatibong transportasyon.

Matud sa driver nga gikalipay niya ang report nga panggukdon na karon sa LTFRB ug LTO ang Angkas kay kolurum lagi. Sa kahuot sa mga karsada karon tungod sa kadaghan sa mga sakyanan, ug ang tanan halos nagdali sa ilang padulngan, siyempre mangita g’yud og kasakyan nga makaliot-liot ra, sama sa habal-habal ug Angkas. Pero mas mopili tingali ang kadaghanan sa Angkas kay mura’g safe man kay ang sistema sama ra man usab sa Uber, gawas pa, limpyo ug hapsay dili lang ang motor, kon dili, lakip na ang postora sa driver nga naka-uniporme pa.

Husto baya ang akong gikaestorya nga taxi driver nga ang higpit nilang ka kompetensya karon mao ang Angkas. Gani, atong maobserbahan nga hilabihan na g’yud ka daghan ang mga motor karon sa kadalanan nga halos mobag-id na sa mga sakyanan.

Kini ang gipanagan-an sa LTFRB nga magdasok na unya ang mga Angkas sa kadalanan. Apan nganong karon ra man sila nangugat paggukod sa Angkas? Nganong luag man kaayo sila sa mga habal-habal nga dugay na kaayong nagbiyahe sa kadalanan?

Sa Uber ug Grab, daghan gihapon kaayong nagbiyahe bisan og kolurum, gihingusgan ba nila og dakop? Hutdon na lang unta nila pagdakop ang tanang mga sakyanan nga namasahero nga kolurum.

Bisan og ihanig pa nga mas safety ang Angkas o mas convenient ang Uber, apan tungod kay ilegal man, dakpon g’yud. Wala’y pagpihig, dakpon ang tanang sakyanan nga ilegal nga nagbiyahe sa kadalanan.