Hilas ra kaayo

Isyu karon ang pamahayag sa kadagkoan sa Land Transportation Franchising and Regulatory Board (LTFRB) nga ilegal kuno ang kalihukan niining grupo nga Angkas, nga namasahero gamit ang ilang mga motorsiklo. Gusto kuno nila sa LTFRB nga hunongon ang kalihukan sa Angkas.

Pastilan, naghilashilas na man lang intawon kining mga opisyal sa LTFRB uy. Aw, kon gusto mo nga kampanyahan ang Angkas, nganong wala man ninyo pangdakpa kining mga “habal-habal” drivers? Akong klaruhon ha, dili ko tigsakay niining Angkas ug bisan kausa na lang, wala ko makasakay niini.

Apan gihilasan ko sa pamahayag sa kadagkoan sa LTFRB nga mura ba og nagpasabot nga gusto nilang hunongon ang operasyon sa Angkas? Kon imong tandion ang mga motorsiklo nga gipasakop sa Angkas, ug sa mga habal-habal drivers, mas bentaha na lang sab ang Angkas uy!

Nia ang kalainan. Ang mga driver sa Angkas magsul-ob g’yud og uniporme samtang mamasahero, magsul-ob og crash helmet nga nindot pa g’yud kaayo ang pintal, dili haras-haras ang pagpadagan, ug dili mobiyahe kon ang ilang mga pasahero dili magsul-ob og helmet, ug rehestrado g’yud ang ilang mga motorsiklo.

Ang mga ordinaryo nga habal-habal drivers, daghan kanila nga ang mga motorsiklo walay rehestro, wala’y plate numbers, walay kompleto nga suga, side mirrors, sa laktud ang uban sa mga motorsiklo niining mga driver og habal-habal, gubaon. Aw, ang uban usab mga bag-o, hinoon.

Apan daghan sa mga nag-drive og habal-habal nga motorsiklo wala’y mga lisensya ug haras kaayo nga mopadagan, maoy hinungdan nga makasugat g’yud sila og disgrasya.

Ang mga driver sa habal-habal, daghan kanila ang mga kiat, magbahis-bahis, ug labaw sa tanan, daghan sa mga driver sa habal-habal ang lago kaayo og      sapot.

Unsaon, ang City Hall duna unta’y gitahasan aron pagsuperbisar sa mga driver sa habal-habal apan maayo ra man nga mokubra sa iyang sweldo nga wala’y nahimo.

Mao kini ang pipila sa mga rason ngano nga makaingon ko, nga kon dakpon sa LTFRB ang mga motorsiklo ug driver sa Angkas, nganong dili man nila dakpon ang mga driver sa habal-habal?

Hilas-hilas ra man tawon ning mga opisyal sa LTFRB uy. Kinsa nga board member sa LTFRB nga misugyot nga wad-on ang Angkas? Wala man gani mo’y gihimo sa hilabihan kadaghan nga kolurum nga sakyanan, ang Angkas na hinoon ang inyong daginoton? Wala mo kuyafi!

Ang maayong buhaton sa LTFRB mao nga tangtangan nila sa prangkisa kining mga operator sa public utility vehicles nga wala’y grahe, nga nangilad ra sa LTFRB pinaagi sa pagpatuo nga may grahe sila, apan kutob ra diay sa sketch!