Wala’y mga ayo!

Ang mga kawani sa Office of the Building Officials (OBO) nagpabilin nga nagkiyugpos lang ug wala magtagad nianang nagpadayon nga pagtukod og building nga tupad sa Colonnade diha sa dalan Manalili.

Kanang nagpadayon nga construction sa building, sigurado nga tabonan na usab ang sapa,  kon magduka-duka ra ang mga kawani sa OBO. Ngano kaha nga mura man sila og nagduka? Dili kaha kita makaduda nga adunay hilom nga kasabotan niini?

Kon pakighinabian nato si City Engineer Josefa Ylanan nga maoy hepe sa OBO, ingnon ka lang nga trabaho g’yud unta sa mga opisyal sa barangay ang pag-atiman niini kay ang siyudad adunay ordinansa nga naghatag og gahum sa mga barangay official aron pugngan ang mga illegal construction.

Basin kadtong mga wala kaayo masuheto, makapangutana kon nganong gituki man kini nako.

Una, dunay lagda nga gikan sa tampi sa sapa, tulo ka metros walay tukoron nga mga infrastructure projects, sama sa balay o building.

Nakita nako, bisan og tabon-tabonan nila ang ilang project site, nga ang sapa paingon na nga tabonan. Aw, sumala gud, kon mosulod ka sa tindahan sa Colonnade gikan sa Manalili, makaagi ka ba og sapa?

Angay nga masayod ang tanan nga ilawom nianang tindahan nga Colonnade, sapa kana nga gitabonan sa sementado nga sawog. Karon na unta maoy tukma nga panahon nga i-recover nato ang sapa. Apan unsaon, pakloy kaayo ang mga gitugyanan niining maong katungdanan.

Kadtong tindahan gud diri sa V. Gullas nga utro pa nga wala mohatag og setback, nahuman na lang. Mura’g klaro nga adunay nakadawat sa mga kawani sa City Hall kay wala man sila makahimo og aksiyon.

Pagkasayon ra g’yud unta sa maong trabaho kon tumanon lang g’yud. Si Mayor Tomas Osmeña pud, busy kaayo sa iyang ubang gimbuhaton, ug ang city administrator wala sab magtagad.

Matud pa lagi sa mga mahuyang, “mabayot ko buang.”