Impeachment

Giawhag ni Presidential Spokesman Harry Roque si Chief Justice Maria Lourdes Sereno sa pagkanaog sa katungdanan aron kuno malikayan ang dugang pagkadaot sa hudikatora.

Giawhag ni Roque si Sereno sa pagsunod sa gihimo ni Comelec Chairman Andres Bautista nga mikanaog sa katungdanan tungod sa kontrobersiya sa iyang pamilya. Ang chief justice gipasanginlan ni Presidente Duterte nga nakigkonsabo sa iyang kontra sa politika aron mapalagpot siya sa katungdanan.

Sa reklamong impeachment nga giatubang sa chief justice sa Kongreso, gipasanginlan si Sereno nga nakalapas sa Batakang Balaod, nagbudhi sa pagsalig sa katawhan kaniya tungod sa iyang paggamit sa pundo sa gobiyerno alang sa iyang luho nga pagpuyo, wala pagtug-an sa tinuod niyang katigayonan, pagpamakak sa mga dokumento sa hukmanan ug pagmaniobra sa Judicial and Bar Council (JBC) tungod sa politikanhon ug personal nga rason.

Apan matud ni Sereno nga wala marehistro sa iyang huna-huna ang awhag nga pagkanaog sa katungdanan. Tubag kini sa chief justice nga gipaagi niya sa iyang tigpamaba nga si Atty. Carlo Cruz.

Sa iyang mensahe atubangan sa mga justices, judges ug mga court workers gikan sa nagkalainlaing nasud sa kalibutan nga mitambong sa ikawalo nga International Conference on the Training of the Judiciary nga gihimo sa Taguig City niadtong adlaw nga Lunes, giawhag ni Sereno ang mga sakop sa hudikatora sa paghiusa pagpanalipod og pagpatigbabaw sa balaod ug tawhanon nga katungod.

Iyang gipahinumdoman ang mga mitambong sa iyang nakita sa nagkalainlaing rehiyon sa kalibutan nga gihugpaan sa pwersang political nga mihulga sa pagka independente sa hudikatora.

Ang impeachment mao ang nag-inusarang paagi nga gibutang sa Batakang Balaod aron mapalagpot ang usa ka impeachable nga opisyal. Dinhi ang mga kongresista mao ang mo-prosecute samtang ang mga senador mao ang maghukom.

Ang mga senador mohukom base sa mga ebidensya ug dili sa ilang political affiliation. Apan mao g’yud kaha kini ang mahitabo? Tan-awon lang unya nato.