Halloween wa’y labot pagsaulog sa All Souls Day
Kining atong pagkamasinasinahon, bisa’g unsa na lang ang atong sundon nga himoon sa Western world ug ubang dapit sa kalibutan. Sa among panahon, ang among pagsaulog sa All Saints Day ug All Souls Day was purely religious.
Apan karon, alang sa pipila kanato, mas importante pa ang pagsaulog sa Halloween kay sa pagsimba sa Santos nga Misa alang sa mga Santos ug pag-ampo ingon man pagduaw sa mga gilubngan sa minahal natong nangamatay. Mga maskara sa mga panuway ug demonyo halinon kaayo, ug atong ipasul-ob sa kabataan pagtambong sa Halloween party, as if mao na kini ang pag-observe sa All Saints Day ug All Souls Day.
Anyway, mao na ni kita karon. Wa na ta’y mahimo niini. Bahin sa All Souls Day, sa iyang lindog, si Randy David nagkanayon:
“Our culture directs us to remember those who have passed on—relatives, friends, and other people who have had a profound influence on our lives. We do this by bringing flowers to their graves, saying prayers and lighting candles to hasten their souls’ journey to heaven.”
Hinaot nga mao gihapon kini karon sa mga Halloween enthusiasts.
* * *
Unsa man ni, limutlimotan lang una ang BRT o scrap na lang g’yud for good, sumala sa gusto ni Presidential Assistant Mike Dino, karon nga ang Konseho mihatag og pagtugot kang Mayor Tomas Osmeña to enter into a Memorandum of Understanding (MOU) alang sa pagtuon pagpahigayon sa Light Railway Transit (LRT)?
Ang Transen Group Inc., misugyot pagtukod sa LRT to complement kuno sa na-stalled nga BRT. Sa ato pa, dili tuyo sa Transen Group nga ibasura na lang g’yud ang BRT. Mahimo nga dunganon kini pagtukod.
Apan samtang mag-study pa sa posibilidad sa LRT, sugdan na unta lang ang BRT, perhaps, phase by phase, after all, na-aprobahan na man kini sa NEDA Board ug sa World Bank, tapus sa feasibility study nga gihimo.
Di lang ni nato sagolan sa politika.
* **
Kon unsa ang imong batasan, mao kana ang imong pagkatawo, mao kana ikaw. Sa Eninglis pa, manners maketh man. Sa politika pananglitan, atong makita ang nagkalainlaing kinaiya o batasan sa atong mga lider. Kon unsa ang ilang mga batasan, mao na kana ang ilang pagkatawo.
Sa 2019 elections, sutaa pag-ayo ang manners sa mga kandidato kay mao na kana ang ilang pagkatawo, nga kon magpasagad ka, mag-ilaid lang gihapon ang atong nasud.
- Latest
