EDITORYAL – Climate change wa seryosoha

Daghang nasud ang nilambo og maayo tungod sa paghatag nila og gibug-aton sa problema sa climate change ug hinayhinay nila kining gitagad ug nangita’g pamaagi aron ang tanan gikan sa kinaubsan hangtud sa mga naa sa gobiyerno, seryoso gyud bahin niini.  Mao kini ang kuwang dinhi sa Pilipinas kay maihap lang sa mga tudlo ang mga opisyal nga seryoso g’yud sa ilang estorya.

Daghan diha sa kongreso nga mga “bubble heads,” o mora lang og dekorasyon sa dash board sa sakyanan nga magyanguyango lang ang ulo apan wala sa ilang mga hunahuna ang kaseryoso sa hulga sa katalagman. Apan paestoryaha batok sa ilang mga kontra sa politika ug pahambugerohay,  pulos kaayo mga banggiitan, apan bisan pagsulbad sa baha wala’y nahimo.

Sumala pa sa gihimong 2016 Climate Change Vulnerability Index, ika-13 ang Pilipinas sa most climate-vulnerable country dala niining dili moubos 20 ka bagyo nga mosulod kada tuig. Bisan kini na lang unta nga inpormasyon ilang seryosohon, basin may makita pa nga kausaban. Duna na kita’y National Disaster Risk Reduction and Management Act of 2010 ug Climate Change Act of 2009, apan mora lang ni og mga pulong nga sinuwat sa papel, kun ang mga naa sa gobiyerno dili moseryoso sa pagpatuman sa tanang mga nakalatid niini.

Daghang balaod sa Pilipinas nga makasuporta niining duha, apan wala man taronga pagpatuman, sama sa Clean Air Act, Waste Management Act, Land Conversions, Environmental laws ug daghan pa nga, wala pa’y labot sa mga local ordinances. Lisud kaayong hunahunaon nga sa 20 ka mga bagyo kada tuig nga mosulod sa teritoryo sa Pilipinas, ang walo niini motugpa g’yud sa kayutaan ug gub-on ang panginabuhian sa mga Pilipino, apan wala gihapon seryusoha sa mga magbabalaod ug mga local officials?

Unsaon man pagsunod sa mga tawo niining mga balaora kun ang mismo nga mga national ug local officials wala man moseryoso?