Marawi libre na ba?

Human sa hapit tunga sa tuig nga kumbati, natapos na sa katapusan ang kaguliyang didto sa dakbayan sa Marawi human mapatay sa kasundalohan ang duha ka lider sa mga terorista nga misulong niini kaniadtong Mayo.

Matawag nga dakong kadaugan ang pagkamatay ni Isnilon Hapilon, ang idlas nga lider sa Abu Sayyaf, ug sa usa sa mga Maute brothers, sa dakong pag-atake sa militar aron pagluwas sa nahibilin nga mga bihag didto.

Ug gikumpirma usab mismo ni Presidente Rodrigo Duterte nga napatay usab atol sa maong pag-atake ang usa ka Malaysian national kinsa usa ka dako nga financier sa mga terorista nga misulong sa maong dakbayan.

Apan gawasnon na ba gayud ang dakbayan sa Marawi ug silingan nga mga lugar gikan sa hulga sa mga terorista? Mao kini ang dako nga pangutana karon human sa deklarasyon mismo ni Duterte nga libre na ang maong dakbayan gikan sa mga bandido.

Daghan ang dili motuo nga hurot na og kapulbos ang mga terorista nga misabwag og kagubot didto sa Marawi. Tingali, adunay daghan usab ang nakaeskapo gikan sa gipakusgan nga mga operasyon sa kasundalohan.

Ug angay gayud nga gukdon sila sa militar. Dili lalim ang kadako sa kadaot nga ilang nahimo sa maong siyudad, ug delikado nga magplano sila og lain na usab nga pagpangatake sa ubang lugar sa Mindanao.

Mao na nga angay gayud nga kinahanglan magmaigmat dili lamang ang otoridad, kondili, ang tanan. Dili na gayud kita makatugot nga masubli pa ang nahitabo sa Marawi didto sa Mindanao o sa bisan asa nga lugar sa nasud.

Hagbay ra kanang rebelyon sa mga igsuon nato nga Muslim sa Mindanao. Kini tungod lagi kay gusto sila og independensiya didto, apan mibunga usab kini og mga radikal nga prinsipyo, hinungdan usab sa mga terorista’ng binuhatan sa pipila kanila.