Tanod brutality

Mahinungdanon kaayo ang papel sa mga barangay tanod sa pagpatuman sa kahapsay ug kalinaw sa ilang barangay. Sila ang una nga kadangpan o frontliner sa pagresponde kon adunay mahitabong kaguliyang sa katawhan.

Apan unsa man ang mahitabo kon ang giisip nga dangpanan mao na man hinuon ang mangtas nga mopasipala ug mokutlo sa kinabuhi, sama sa nahitabo sa Barangay Ermita, dakbayan sa Sugbo?

Gidakop sa usa ka tanod ang lalaki nga hubog nga giingong nagdala og tubo nga puthaw. Apan imbes itugyan sa estasyon sa kapolisan, gibalhug hinoon kini sa prisohan sa barangay.

Unya, nasayran na lang nga napusilan ug napatay kini sa laing tanod tungod kuno kay misulay sa pagdagan diha nga ihatod na unta sa kapolisan.

Nasuta nga sa wala pa mapatay ang lalaki, gikulata pa diay kini ug gibutangan pa og packaging tape ang baba ug gibinaklid pagposas. Literal kini nga tanod brutality, base usab sa giingon sa mga testigo. Naka-seminar ba kaha kining mga tanod sa barangay aron makat-on sa mga angay’ng himoon sa pagtuman nila sa ilang tahas? Nasayod ba kaha sila kon unsa’y limitasyon sa ilang trabaho?

Gikinahanglan nga tutokan sa barangay ang pagpalapad sa katakus sa mga tanod ug pagpalambo sa ilang salabotan mahitungod sa batakang katungod sa katawhan. Mahinungdanon kaayo ang papel sa mga tanod sa peace and order, apan ang gamay’ng gahum nga gihatag kanila kinahanglang gamiton nila alang sa kalinaw, ug dili abusaran sa kadaotan.

Ang gahum nga huptan aduna g’yuy kauban nga responsibilidad. Hinoon, kon duna may nagpabadlong gamay lang sila sanglit daghan sa mga tanod nga nagtarong sa ilang serbisyo bisan og wala’y sweldo, kon may honorarium man gani, gamay ra sab kaayo.

Dili g’yud makapanghunaw ang mga opisyal sa barangay sa palpak sa ilang mga kawani sama sa nahitabo sa Ermita. Aron dili na kini masubli pa, kinahanglang pasabton g’yud ang mga tanod sa pagtahod sa tawhanong katungod.