Banat ( Leaderboard Top ), pagematch: 1, sectionmatch: 1

Palusot sa Ermita

Pulos sayop ang pasiuna nga kasayuran nga gihatag ni Barangay Kapitan Imok Rupinta sa Ermita, Cebu City sa Arangkada sa DYAB Abante Pa, Bisaya! mahitungod sa ilang dinakpan nga napatay sa iyang mga barangay tanod niadtong Martes sa kadlawon:

Gibalikbalik niya nga badlungon ang dinakpan ug nisukol pa gani sa mga tanod dihang gibadlong,dayong panglungkab og tindahan sa Freedom Park;

Lima ka tanod ang nidakop ug lima ka tanod ang nidala sa dinakpan ngadto sa Carbon Police Station; ug

Napugos ang mga tanod pagpusil sa dinakpan dihang kalit ug kusog nga nidagan.

* * *

Sukwahi nga kasayuran ang nahipos sa pasiuna nga pakisusi sa mga imbestigador sa Cebu City Police Office (CCPO):

Wa’y nireklamo batok sa dinakpan, wa’y tindahan nga diriyot malungkab ug posibleng naghimohimo lang og estorya ang mga tanod aron pagtabon sa bangis nga krimen;

Duha ra ka tanod ang nisurender, ang una niangkon nga maoy nakapusil samtang ang ikaduha niangkon nga maoy nagkulata sa dinakpan ug nibaat sa iyang baba; ug

Ang tanod nga niangkon nga nakapusil niinsister nga nisuway ang dinakpan pag-ilog sa iyang armas maong iyang gipusil pagpanalipod sa iyang kaugalingon.

* * *

Pulos lisud tuohan ang mga pangangkon nilang Kapitan Rupinta ug sa iyang mga tanod mahitungod sa napatay nilang dinakpan:

Bisan kinsa nga gibinaklid pagposas maglisud sa pag-ilog og armas ug bisan sa pagdagan;

Ang pasangil sa tanod nga gikulata niya ang dinakpan kay nagsaba-saba gisukwahi sa ubang piniriso sa barangay hall nga nihulagway sa dinakpan nga hilomon ug nagdumili gani pagkaon; ug

Dihang napusilan na niyang dinakpan, niingon ang tanod nga nipauli siya ug wa na magtagad pagsusi sa kahimtang sa biktima.

* * *

Human gideklarar sa CCPO ug Commission on Human Rights (CHR) nga wa’y gahum ang barangay pagtanggong sa mga dinakpan, nipasabot ang mga opisyal sa Ermita nga gitukod nila ang selda aron paghatag og higayon sa mga dinakpan ug mga nangreklamo pag-areglo sa kaso sa dili pa moabot sa kapolisan.

Kon mao, nganong gitanggong pa man ang napatay nilang dinakpan nga lisud man nga areglohon kay badlungon, nisukol nila ug nagsaba-saba sa selda?

Sa wa’y paghisgot nga wa’y nireklamo batok niya? Pahinumdom nilang Rupinta ug kaubanan: Ang pagtabon mas grabe kay sa krimen.

* * *

leo_lastimosa@abs-cbn.com.

  • Follow Us: