Taxi samot ka alkanse

Giaprobahan sa Land Transportation Franchizing and Regulatory Board (LTFRB) ang gipangayong umento sa pleti sa taxi.

Gihimo nang permanente ang 40 pesos nga provisional flagdown rate sa mga taxi.

Ang naandan nga 3.50 matag 300 meters nga dugang gihimo na karon nga 13.50 kada kilometro.

Ug ang kanhi 3.50 kada dos minutos nga waiting time, gihimo na karon nga 2 pesos kada minuto nga running time. Bulahan ang mga taxi operators ug drivers tungod kay puno man ang ilang bulsa sa kita tungod sa naasoy’ng umento.

Apan alaot ang mga pasahero tungod kay hilabihan ka dako ang fare hike kay kon tinambanon sa pagkwenta halos modoble sa naandan nga pleti o mas dako gani kon huot ang traffic.

Rason sa LTFRB nganong gipaboran ang petisyon sa kahugpongan sa taxi aron dili na magpabadlong ang mga taxi drivers kinsa mangigo sa mga pasahero tungod kay dagko naman ang kita niini sa pamasada.

Gi-pattern kini sa kita sa Transport Network Vehicle Service sama sa Uber ug Grab.

Panghinaut sa ahensya nga suklian sa mga taxi drivers og maayong serbisyo ang katawhan.

Makaayo kaha kini sa industriya sa taxi ang sobra ra ka mahal sa pleti taliwala sa higpit ka kompetensya nila nga Uber ug Grab?

Nitiyabaw na man gani sila tungod kay mas gipili na sa mga tawo karon ang TNVS nga maoy sakyan tungod kay mas convenient, limpyo ug segurado kuno kay fixed man ang bayronon itandi sa taxi nga panguyawan ka pila ang mabayran kay gadagan man ang metrohan.

Basin baya og mosamot pagkaalkanse ang kita sa mga taxi tungod sa umento sa pleti kay nihit na man ang mosakay. Samtang gikinahanglan pa nga mapublikar sa pamantalaan ang fare increase sulod sa kinse ka adlaw ayha kini mapatuman.