Malungtarong solusyon sa problema sa druga

Dako ang atong katingala ngano nga sa kadaghan na nga nangamatay gumikan sa suliran sa druga, wala kita’y nakitang kasulbaran ning maong suliran. Nagpasabot sa kagrabe na ning maong suliran, nga maayo na nga pagkagamot sa kaugatan sa nahilambigit niini.

Gipakabaliwala lang sa mga drug user, pusher, supplier, ug protector ang kampanya batok sa drug addiction, ug gi-ignore lang ang liboan na nga nangamatay gumikan niining maong suliran.

Gumikan niini, adunay mga sugyot nga ang gikinahanglan, dili ang tukhang, dili ang giingon nga extra-judicial killing, kondili, ang usa ka malungtaron nga solusyon, long term solution to the drug menace, matud pa.

Giingon nga ang pagpamatay lang sa mga drug personality, wala makasulbad sa hingpit ning maong problema. Unsa man kining giingon nga long term solution? Mao kini ang angayang tutokan sa atong gobiyerno.

Matud pa, usa kini ka behavioral nga suliran. Kinahanglan tun-an pag-ayo kon ngano nga modangop sa druga ang tawo. Lisud ning tubagon nga kon wala’y moyupyop sa druga, wala usa’y pusher, wala’y supplier, ug walay mag-manufacture niini. Busa, ang gamot niining tanan, mao ang pagpuo sa mga drug user.

Hangtud nga dili nato kapugngan ang pagpaulipon sa gidiling druga, dili gayud nato masulbad kining maong suliran. In the meantime, atong suportahan ang paningkamot karon sa atong gobiyerno pagpuo sa suliran sa druga.

* * *

Lagmit, nataligam-an lang kini sa atong gobiyerno, gumikan kaha sa kadaghang suliran nga giatubang niini karon, ilabi na sa aspeto sa infrastructure.

Usa sa nakatampo sa grabe na nga pagbaha sa nagkalainlaing dapit sa dakbayan mao ang kahugaw sa mga estero. Ang hugaw nakabalda sa pagdagayday sa tubig-ulan. Kini, gawas sa kadaot nga mahimo niini batok sa atong panglawas.

Ang paglinis niini, nagkinahanglan usab og serious ug long term nga solution. Akong tan-aw, wala’y nagtagad ug wala’y nagpakabana niini. Hinungdan nga wala mo-epekto ang mga proyekto sa drainage nga atong gipasiugdahan.

Sa pipila ka dapit sa dakbayan, ang mga estero gihimong labayanan sa basura, diin kasagaran niini mga plastic. Sa ato pa, disiplina ang gikinahanglan. Disiplina sa katawhan mismo.

So, it seems nga sa atong pagsulbad sa pagbaha, atong sugdan ang pag-disiplina sa katawhan, which para nako, lisud ug imposible kaayong buhaton. Ug lagmit mao kini ang hinungdan ngano nga medyo mi-give up na ang gobiyerno pagsulbad ning suliran sa kahugaw sa estero.

So, kon buot hunahunaon, atong maingon nga kadaghanan sa atong mga suliran, mugna ug binuhatan sa tawo mismo. Disiplina?