Pagkabanhaw sa tingog
Atol sa kinapungkayan sa popularidad ni Presidente Rodrigo Duterte, kanus-a ang tanan niyang sulti ug lihok giabibahan sa katawhan nga puno sa paglaom nga matinuod ang iyang gisaad nga dagkong kausaban paghimo sa katilingban nga mas makiangayon alang sa tanan, wa’y nangahas sa pagbaraw kaniya.
Ang pipila nga naghupot og sukwahi nga baruganan, sa wa pa moluwat og bisan unsa nga pamahayag, naneguro pagpahipi sa deklarasyon nga hingpit silang nagsuporta sa hiningusgan nga kampanya sa pamunoang Duterte batok sa kriminalidad ug pangurakot, apan igo lang nisugyot og lahi nga paagi sa pagpatuman niini.
* * *
Bisan ang Simbahang Katoliko, kansang mga pari ug mga obispo nahiagom sa mga balikas ug bugal-bugal ni Presidente Duterte tungod sa pipila kanila nga nakapanamastamas og mga bata ug mga babaye sa ilang mga parokya, nipili sa pagpakahilom inay sa pagpanalipod sa ilang kaugalingon.
Bisan si Bise Presidente Leni Robredo ug ubang mga lider sa oposisyon nilikay sa pagluwat og mga pamahayag nga direktang mohagit sa mga baruganan ni Duterte ug mainampingon sa ilang pagpasabot sa panginahanglan sa pagpatigbabaw sa tawhanong katungod ug sa sistema sa hustisya.
* * *
Klaro nga gilikayan nila nga masugamak sa gidangatan sa mga wa kamatngon sa dakong risgo sa pagsungag sa pamunoang Duterte. Sama ni Senador Leila de Lima nga nabalhug sa bilanggoan tungod lang sa nagkasungi nga mga testimoniya sa mga konbiktado sa New Bilibid Prison nga pulos gipasaligan og immunity sa liderato sa House of Representatives.
Tuod man, sila si De Lima, mga pari ug mga obispo nga wa magtagad paghapaw-hapaw sa ilang sinultihan, nahiagom sa wa’y kinutoban nga kauwawan. Naangin pa ang inosente nga mga higala ug mga sakop sa ilang pamilya.
* * *
Apan karong bag-o, tungod sa sunudsunod nga pagpatay sa mga bata sa gubat sa drugas, inanay nga nakaplagan pagbalik sa nagpakabana nga mga sektor sa katilingban ang ilang tingog, ug nakugang si Duterte sa kapintok ug kalanog sa hiniusa nilang tingog.
Labing lisud lalison ang iyang mga alyado sa 16 sa 23 ka senador nga niawhag pagtapos sa extrajudicial killings nga sila si Joel Villanueva, Ralph Recto, JV Ejercito, Sherwin Gatchalian, Panfilo Lacson, Grace Poe, Nancy Binay, Francis Escudero, Sonny Angara ug Loren Legarda.
* * *
- Latest
