Kawayan

Ang kawayan usa sa mga tanom nga daghan kaayo og kapuslanan. Mahimo kini nga furniture, dapat sa balay, ug ang dahon niini may mahatag usab kuno nga kaayohan sa panglawas sa katawhan hinungdan nga namugna ang bamboo tea.

Ang kawayan dili kahoy, kon dili, nahisakop kini sa pamilya sa mga sagbot. Kini ang giila nga kinadak-an ug kinatas-an nga sagbot nga dili dali maibot. Siyempre, dali kini nga matay-og bisan sa gamay’ng huros sa hangin apan lisud patumbahon tungod kay makabalik ra man dayon sa pagbarug.

Makatabang usab kini sa pagsala sa tubig aron dili mabanlas ang yuta, o soil erosion. Kon adunay tanom nga lig-on ug malungtaron, segurado nga usa na ang kawayan niini. Kini ang rason nganong ang kawayan maoy gipili sa Cebu Provincial Environment and Natural Resources, sa pakig-alayon sa Barangay Gaas, Balamban nga gipangtanom sa ilang dapit.

Kini giatol usab sa kasaulogan sa World Bamboo Day isip pagpakita sa kamahinungdanon sa kawayan sa pagproteher sa atong kinaiyahan tungod ug alang sa katawhan. Mga 2,000 ka punoan sa kawayan ang natanom niadtong adlaw’ng Sabado nga gisalmotan sa nagkadaiyang organisasyon gikan sa publiko ug pribadong sektor.

Apan bisan unsaon sa pagpaningkamot sa uban nga mapanalipdan ang kalikupan kon adunay mga tawo nga wala magpakabana mismo sa ilang kahimtang, ang tanan kawang lang. Sama sa nahitabo sa Lower Ponce, Barangay Capitol Site, Cebu City nga adunay duha ka kinabuhi nga nakalas human natumbahan sa punoan sa kawayan nga naluka dihang midahili ang yuta tungod sa kusog nga ulan.

Matag usa kanato adunay responsibilidad sa atong kinaiyahan ug labaw na sa atong kinabuhi nga kapanalipdan.