Lungag duol sa STC delikado

Kaniadtong Septiyembre 22, alas 5:10 sa buntag, usa ka kotse ang hapit g’yud mabuwasot sa dakong lungag sa karsada duol sa ganghaan ug exit sa St. Theresa’s College sa General Maxilom Avenue niining dakbayan.

Ang sakyanan gimaneho ni Edwindo Morales, acting operations manager sa Casino Filipino-Cebu, Philippine Amusement and Gaming Corporation (PAGCOR), ug may duha ka sakay sa likud nga mao ang buntis nga asawa.

Gikan pa sa Talamban, Cebu City ang naasoy’ng kotse ug nagdali kini nga makaabot sa ospital kay iskedyul na nga ipatsek-ap sa Cebu Maternity Hospital ang buntis nga pasahero.

Kusog na ang dagan sa kotse nga nagdulhog gikan sa may Foodarama dihang namatikdan ni Morales nga ang girumbo nila usa na ka nagbuntaog nga anino sa Orange Road Barrier.

Dali nga gikabig ni Morales ang manobela paingon sa wala aron dili sila mahulog sa dakong bangag. Apan bisa’g giunsa og maniobra, nasangit g’yud ang kilid sa kotse didto sa giali nga Orange Road Barrier ug mibuto ang pangunahang ligid nga naigo sa hait nga nagtuybo nga kabilya.

Wala hinuo’y nasamad o napiang. Pero nalumping g’yud ang bag-ong kotse ni Morales, diin ang nabuslot nga ligid dili na g’yud magamit.

Matud pa ni Morales nga gikahinabi ning tagsulat, wala’y reflector o warning lights panahon sa gabii ang maong dakong lungag. Gani, may taxi driver man, kinsa nakasaksi sa hitabo nga miduol niya ug mipahibalo nga ubay-ubay na nga sakyanan ang nangadisgrasya didto.

Pangandoy ni Morales nga mahibaw-an kini ni Mayor Tomas Osmeña aron maaksiyonan dayon ang kakulangan ug mabuhatan og dugang safety measures samtang wala pa’y kinabuhi nga nakalas, ug Banat News lang ang makatabang niini.