Opisyal nag-operate og illegal swertres?

Duna g’yuy mga informer nga tukma kaayo nga mohatag og inpormasyon, ug usa na niini ang akong informer diha sa Barangay Suba, dakbayan sa Sugbo.

Mitawag g’yud siya kanako kagahapon ug gitug-anan ko niya sa tanang detalyi kabahin sa operation sa illegal swertres, video karera ug molimoli. Apil sa iyang gitug-an ang mga tawo nga nalambigit niini.

Pastilan, sama sa gihapon milutaw na usab ang ngalan sa usa ka opisyal sa Barangay Suba nga maoy usa sa dakong operator sa illegal swertres dinhi sa Sugbo.

Dili ra diay diha lang sa Suba ug Pasil ang operation sa illegal swertres niining maong opisyal sa barangay. Daghan diay kini og mga tawo nga anha mo-remit kaniya.

Gipasusi usab nako sa akong higala sa intelligence unit ang report nga adunay laing operator og illegal swertres diha duol sa balay sa kanhi mayor sa dakbayan, apan gitug-anan ko sa akong gisugo nga taud-taud na diay nga gibiyaan ang maong dapit sa nagpasiugda sa illegal swertres. Buyno, maayo kon mao kana.

Pero tay’m pa gani, unsa may gihimo ni Suba Barangay Kapitan Joel Sable niining report nga adunay usa ka opisyal sa iyang barangay nga nagpadagan og ilegal nga sugal? Ayaw ko’g ingna Kap nga wala ka masayod niini ug wala ka makaila kon kinsa kining maong opisyal?

Ang akong inpormer, mitug-an usab kanako og mga ngalan sa duha ka tawo nga bag-o pa nga nagsugod-sugod pag-finance og illegal swertres diha sa ilang dapit sa Suba.

Unya, kadto sab nga masiao operator kaniadto nga nagpuyo diha sa Tupas Street, mibali na sab diay sa illegal swertres.

Sa sunod nato nga isyu, hisgotan nato ang usa ka negosyante sa Taboan nga nalambigit usab sa illegal nga sugal. Kining illegal swertres gikuha ang winning combination niini sa resulta g’yud sa Lotto, apan ang nakaapan lang kay wala ni sila magbayad og buhis sa gobiyerno.

Sayonan ka nga mohalin diay kuno og subra sa tunga sa milyon ka pesos kada adlaw kining mga operator sa illegal swertres? Pananglit dili sila maig-an og numero, wala’y makadaog, ang maong salapi bulto nga mahipunta sa ilang panudlanan.

Unya, mangutana mo nganong ang mga polis wala’y lihok? Aw, kamo, unsay anaa sa inyong huna-huna. Hagiton nato si Chief Inspector Keith Andaya, ang hepe sa Sawang Calero Police Station, nga himoi og operation kining opisyal sa Barangay Suba, ug naa pa’y sa Pasil.

Sa Barangay Ermita, hisgotan nato sa sunod nato nga lindog. Ang inyong inpormasyon ipadala sa 0943-0766611.