Congrats Junjun Osmeña

Mura’g gitagana g’yud sa Kahitas-an nga ang anak ni kanhi Cebu City vice mayor Renato V. Osmeña nga si Junjun Osmeña mahimo nga usa sa mga konsehal sa dakbayan sa Sugbo.

Napilde man tuod si Junjun sa paglansar niya pagka konsehal atol sa eleksiyon sa miaging tuig, apan karon siya ang ihulip sa mi-resign nga si Konsehal Nendell Hanz Abella nga gitudlo nga commissioner sa National Labor Relations Commission (NLRC).

Gusto unta ko nga mobotar kang Junjun Osmeña sa miaging eleksiyon apan dili man mahimo kay didto man siya midagan sa south district sa dakbayan sa Sugbo. Tan-aw nako, gusto g’yud nga moserbisyo sa publiko si Junjun Osmeña.

Tiaw mo, manager na siya sa Philippine Amusement and Gaming Corporation (Pagcor)-Parkmall Branch nga dako kaayo og suweldo, daghan og benepisyo, apan mituyo ra g’yud siya pag-resign sa iyang trabaho kay gusto nga manerbisyo sa katawhan dinhi sa dakbayan.

Diha nga gideklarar na sa Comelec nga pilde si Junjun Osmeña sa miaging eleksyon, nasubo g’yud ko. Ang uban nakong mga higala nga nakaila ni Junjun, miingon g’yud nga dili hambugero kining mao nga anak ni vice mayor Renato Osmeña.

Karon nga giendosar na man diay ang iyang ngalan ni kanhi Vice President Jejomar Binay ngadto kang Presidente Duterte aron itudlo sa nabakanteng puwesto sa pagka konsehal sa dakbayan sa Sugbo, atong lauman nga siya na g’yud ang itudlo.

Wala malilong kanato nga si Mayor Tomas Osmeña gusto g’yud nga iyang kaalyado ang matudlo nga hulip ni Konsehal Hanz Abella. Apan tungod kay anaa man sa balaod nga ang partido sa konsehal nga nakamugna og pagkabakante, maoy motuboy og hulip kaniya.

Congrats daan Konsehal Junjun!

* * *

Mura’g namingaw ang mga mipadala nako og report kabahin sa video karera, ngano kaha? Nangundang na g’yud. Si Ermita Barangay Kapitan Imok Rupinta wala na mopahibalo sa kalamboan diha sa iyang barangay.

Ang report nga akong nadawat mao ra nga may video karera diha sa B. Aranas Street, ang caretaker kuno gianggaan og “opaw.” Dili kaayo nako matudlo ang tukma nga lugar. Apan ang informer, gusto gani nga makigkita aron makahatag siya og sketch.

Unya, ang report nga walay hunong nga miabot nako mao ang kabahin sa illegal swertres. Daghan kaayo ni dinhi sa dakbayan kay gipasagdan ra sa mga tanod. Ang report nako nagkanayon nga mga opisyal sa barangay, labi na diha sa Pasil ug Suba, Ermita ug ubang barangay apil niini.

Diha gani sa likud sa baligyaanan og spareparts sa mga airconditioning unit sa Mabini, dili layo sa sapa, naay swertres outlet diha.