Cash aid ugma

Ang cash assistance alang sa mga senior citizen ning dakbayan sa Sugbo ipanghatag ugma, Sabado sa buntag hangtud sa udto, diha gihapon sa mga barangay. Ang P1,000 nga madawat ika-siyam na sa P12,000 nga cash aid karong tuiga. Sa ato pa, aduna pa’y P3,000 nga paabuton ang mga senior citizen.     

Dako kaayo kini og ikatabang ngadto sa mga senior citizen. Sa maintenance medicine lang, gawas sa diskuwento nga atong napahimuslan pagpalit og tambal, makadugang kini pagpagaan sa problema pinansiyal, ilabi na niadtong wala na’y klaro nga kinitaan.

Mahitungod sa panglawas sa mga senior citizen, diin “vulnerable” kaayo kita sa bisan unsa  nga sakit, adunay sugyot nga kon unsa man nga dugang health programs ug benefits, ilakip unta nga kahatagan usab og discount ang pagpa-executive checkup sa mga senior citizen.

Matud ni Ramon J. Farolan, usa sa mga advocates pagpakabana sa mga panginahanglan sa mga senior citizen, atong kutloon: “As senior citizens grow old, the importance of regular executive checkups becomes more pronounced.”

Sa magkatigulang ang mga senior citizen, mas gikinahanglan ang regular nga executive checkup. May kalabutan kini sa pag-checkup, o pagpahiling sa mga doctor sa kahimtang sa atong panglawas, sama sa blood pressure, sugar levels, cholesterol counts, urinary tract infections o prostrate problems, X-ray, ubp.

Sa atong nasayran, ang executive checkup, usa ka “package” nga matang nga health service. Wala kita’y hingpit nga kasayuran kon nalakip ba kini sa 20% nga discount. Sa akong experience mao ra man og wala kini malakip sa discount.

Maayo unta kon kahatagan kini og pagtagad sa concerned government agencies, sama sa DSWD, DOH, DTI, ug BIR.

* * *

Sa usa ka pagtuon sa British Medical Journal uban sa 20,000 ka British folks, nakita nga ma-cut in half ang risgo nga ma-stroke ang usa ka senior citizen kon mohimo lang ning mosunod: “being active for 30 minutes a day, eating five daily servings of fruit and vegetables, and avoiding cigarettes and excess alcohol.”

(Please note nga ang respondents 20,000 ka taga-Britania, dili pareho dinhi sa ato, nga tag-1,000-2,000 ra ka tawo ang survey-hon). 

Sayon kaayong paminawon, apan, daghan kanato ang maglisud pagbuhat niini. Maka-active ka ba sulod sa 30 minutos matag adlaw? Makakaon ka ba’g lima ka servings sa prutas ug utan kada adlaw? Ug labaw sa tanan, makabiya ka ba sa sigarilyo ug sa subrang pag-inom sa alak?

Sumala pa, you are what you eat and how you live that determine how well you age.