EDITORYAL - Dakong hagit sa traditional media

Dako kaayo ang  hagit sa tradisyonal nga media pagsiguro nga magpabilin ang kaligdong niini aron tuohan ug saligan sa publiko. Nahimo karong kakompetensiya sa media ang internet nga diin nikusog ang social media nga nagsilbeng pahungawanan sa mga netizens sa ilang gustong ipadayag. Nahimo kining venue nga kakuhaan og inpormasyon nga usahay maoy nagsilbe nga sugnod sa mga pagbati sa katawhan gikan sa managlahing mga hilisgutan.

Gikan sa maong mga inpormasyon, naporma ang mga opinion nga gisaw-an sa mga tawo ug usahay maoy nahimong sukdanan ug basehan sa paghimo og mga palisiya, mga balaod, aksiyon ug uban pa aron pagtubag sa mga pangutana ug problema. Tungod sa social networking sites, nakuhakuhaan ang mga tigbasa ug tigsunod sa mga lehitimong media outfits.

Apan unsaon na lang kon kining bag-ong gikahiligan sa mga tawo nga tinubdan sa mga inpormasyon, napuno man og mga kwestiyonableng unod. Ang social media gikinahanglan kaayo sa moderno karong panahon. Solusyon kini sa mga nagdali. Apan sama sa uban, aduna usab kini dili maayo nga epekto kay gawas nga nahimong tapolan ang uban manukiduki ug mogamit sa ilang hunahuna ug imahinasyon.

Giwadwad usab  diha ang mga inpormasyon, hasta ang mga bakak sama sa fake news, pagpangdaot og imoralidad nga makita sa kabataan. Dili tanang mga ginikanan ang makamao mogamit niining bag-ong teknolohiya mao nga peligro kini para sa ilang mga anak.

Apan wala kini magpasabot nga wa na’y mahimo ang mga ginikanan ug ang traditional media nga batokan kining mga makadaot nga mga inpormasyon gikan sa internet. Dako kining hagit kay kaakohan sa mga tigbalita ang pagsabwag og kamatuoran nga wa’y dapigdapig.