Tulay sa Ermita ug Pasil

May mitambag nga ang tulay nga nagdugtong sa Barangay Ermita ug Lawis, Pasil butangan unta og mga tanod kay anha diay kuno diha magbaligyaay ang mga mopalit ug ang mga tigbaligya og shabu.

Nindot sab kini nga tambag ug ako ni nga itugyan kang Kapitan Felicisimo “Imok” Rupinta ang paghimo og lakang kabahin niini. Sa ato pa, kanang tulay nga nilagbas sa sapa diha sa Ermita anha magtagbo ang mga pushers ug ang mga mopalit?

* * *

Kamo nga mga nagpuyo sa usa ka dapit, paghugpong ra gud mo, unya ireklamo ninyo ang mga tawo nga anaa nagpuyo daplin sa karsada nga maoy nakapagamay sa atong kadalanan.

Ayaw ninyo ipasuwabi ang kahadlok ug kaikog ngadto sa mga abusado ninyo nga silingan kay kon mahitabo nga may sunog sa inyong lugar, dili g’yud makasulod ang bombero aron pagpawong sa sunog. Huwaton pa ba ninyo kini nga mahitabo usa moreklamo?

Diay reklamo gikan usa usa ka taga Alaska, Mambaling. Gamay na g’yud kuno kaayo ang karsada sa ilang lugar kay ang kabalayan gianam-anam man og sibog ngadto sa luna nga alang na unta sa agianan sa sakyanan. Gawas sa mga balay nga gipaabot na ngadto sa karsada, ang karsada giparkingan pa g’yud og sakyanan sa wala’y pagpakabana nga daghan ang masakripisyo. Huna-hunaa ninyo pag-ayo kon angay ba nga ipadayon ang inyong katalawan ug kamaikugon.

* * *

Dia’y laing reklamo gikan sa usa ka lumolupyo sa Barangay Ermita. “Sir, palihug og awhag sa mga polis nga pangsakmiton gayud nila ang mga gambling machines nga mikatap kaniadto diri sa among barangay. Karon, guerilla type ang ilang gihimo.”

Gitug-an sa complainant nga gipangtagoan ra diay kuno ang ubang kahon sa video karera ug moli-moli nga gipaduwaan diha sa Ermita. Sagad kuno niini, “LT” ang logo kay wala diay kaayo’y makasulod diha nga laing mga gambling machines kay taga diha ang tag-iya niining LT.

Buyno, kon kamong katawhan moabag, mapuo g’yud ang mga ilegal nga kalihukan. Ang gidayeg g’yud nako mao ang akong inpormer nga taga Barangay Tejero kay mokalit lang og ari sa opisina ug motug-an kon mamalik na usab ang karera ug moli-moli sa ilang dapit.

Karon, daghan sab kuno sa Tejero, ilabi na sa likud sa karaang provincial jail, ug diha sa dapit sa Liberty hardware, kining mga computer games nga tan-aw nako, ilegal gihapon ug angay’ng ipahunong.

Palihug kuno sir Chief Inspector Jovito Labra, ang hepe sa Waterfront Police Station. Ang mga karera ug moli-moli diha adunay logo nga TM. Ang uban ‘sab gipanag-iya kuno sa usa ka Wendel. Nag-operate pa ba gud og karera si Wendel? Sakmita ninyo mga polis.