Wa’y makapaningil ni Duterte
Nagkinihaay sila si Senador Richard Gordon ug Senador Antonio Trillanes tungod sa init lang lalis atol sa usa sa mga hugna sa imbestigasyon sa Senate Blue Ribbon Committee sa P6.4 bilyones nga kontrabando sa shabu gikan sa China.
Sa kasong iyang gipasaka sa Senate Ethics Committee, gipasanginlan ni Gordon si Trillanes nga niluwat og mga pamahayag nga wa lang mopakauwaw niya, kon dili, nibuong g’yud sa tibuok institusyon.
Samang pasangil ang gisumbalik ni Trillanes batok ni Gordon, ug may makahuloganon siya nga pakapin: Kon nakalapas sila sa mga lagda, unsa may mahimo batok sa mas seryuso nga kalapasan ni Presidente Rodrigo Duterte?
* * *
Ang pait nga kamatuoran mao nga wa ta’y mahimo batok sa inadlaw nga balikas, insulto ug pakauwaw ni Presidente Duterte. Dili siya mapasakaan og bisan unsa nga kaso sa bisan asa nga korte tungod sa iyang presidential immunity.
Madutlan lang siya sa proseso sa impeachment. Apan dili kaugpo ang bisan unsa nga impeachment complaint tungod sa makabungog niya nga mayoriya sa House of Representatives ug bisan sa Senado.
Gani, laktud nga gibasura sa mga kongresista ang labing una nga impeachment complaint nga mapangahason nga gipasaka batok niya sayo karong tuiga.
* * *
Pila ka semana ang nilabay, gipirmahan sab ni Presidente Duterte ang bag-ong balaod nga nipausbaw sa mga silot nga gipahamtang sa pipila ka probisyon sa Revised Penal Code, apil na niini ang krimen sa pagpakatap og sayop nga kasayuran.
Apil sa gipasanginlan nga nipakatap og fake news mao ang mga sinaligan ni Presidente Duterte sama nila ni Presidential Communications Assistant Secretary Mocha Uson ug sa kadagkoan sa Philippine News Agency (PNA), ang opisyal nga news agency sa gobiyerno.
* * *
Apan unsaon man pagsilot ang fake news ni Presidente Duterte? Apil na ang pagdoble sa suholan sa mga polis ug mga sundawo, pagsulbad sa problema sa ilegal nga drugas sulod lang sa tulo ka buwan ug pagdeklarar nga ilegal na ang pagpabilin sa katungdanan ni Ombudsman Conchita Carpio Morales kansang termino iyang gipamugos nga napupos na niadtong 2015.
Ang pait nga kamatuoran mao nga wa’y makapugong ni makapaningil ni Duterte bisan unsa pa’y iyang buhaton o isulti. Hangtud nga mapupos ang iyang termino, O hangtud nga mas sayo nga makaamgo ang kinabag-an sa katawhan.
* * *
- Latest
