Krimen na ang sayop nga balita Maisip

Maisip na nga krimen ang pagpakatap og dili tinuod nga balita nga makaapekto sa public order. Kini human gipirmahan ni Presidente Rodrigo Duterte ang Republic Act 10951 kaniadtong miaging semana.

Ang nahisgotang balaod nag-amendar sa 87-anyos na nga Revised Penal Code sa Pilipinas. Ang Article 154, Section 18, niining maong balaod magpahamtang og silot nga arresto mayor ug multa nga P40 mil ngadto sa P200 mil niadtong mohimo og gidili nga publication ug pagpamulong.

Ang silot ipahamtang ni bisan kinsa nga tawo, nga pinaagi sa printing, lithography o bisan unsa nga paagi, mopublikar sa mga dili tinuod nga balita nga magbutang sa kapilegro sa publiko ug kadaot sa interes ug dungog sa nasud.

Ang RA 10951 magsilot usab ni bisan kinsa nga mopublikar o kaha moawhag pinaagi sa pagpamulong sa dili pagtuman sa balaod ug sa mga otoridad, o modayeg ug mo-justify sa bisan unsa nga buhat nga gidili sa balaod.

Ang maong balaod nagsilot usab ni bisan kinsa nga tawo nga malisyoso nga mopublikar sa mga opisyal nga resolution, o dokumento nga wala’y igo nga pagtugot, o sa wala pa kini opisyal nga gipublikar.

Pagasilotan usab ang bisan kinsa nga moprinta, mopublikar ug mangapud-apod og libro, pamphlets, periodicals or leaflets nga wala magbutang sa tinuod nga pangalan sa naghimo niini, o ma-classify nga anonymous ang tagsulat.

Kining maong balaod resulta sa mga dili tinuod nga balita nga nanggawas sa social media. Busa maingon nato nga ang gitawag nga social media ang puntariya niining maong balaod. Giabuso man gud sa social media ang kagawasan sa pagpadayag.

Ang mainstream media dili pud makalingkawas sa silot sa pagpublikar og fake news, hinuon, layo ra kaayo sa posibilidad nga sila masilotan tungod sa ka estrikto sa proseso nga maagian sa dili pa mapublikar ang balita, dili pareho sa social media nga wala’y gisunod nga proseso.