EDITORYAL - Maayo ang tumong, apan sayop

Nilusad og house-to-house drug testing ang kapolisan sa Quezon City. Target nila ang mga slum areas o kadtong mga komunidad, diin magpuyo ang mga pobre ug kadaghanan mga drug pushers ug mga drug users. Ang pangutana, makatarunganon ba kini? Pugsanay diay ni karon ang pagpaubos sa drug test sa mga tawo?

Tingali, ang uban moingon nga wala’y problema para nila, apan ang uban nabalaka kay basin og binuangan sila sa mga polis o may tawo nga adunay kasuko kanila ug gamiton ang kaila nilang mga polis aron sila mapasanginlan nga drug users. Ang sala lang sa mga Pilipino mao nga kadaghanan kanila mga kabus. Karon, basta anha ka magpuyo sa mga slum areas, sa ato pa, drug addict o drug pusher ka na?

Ang Commission on Human Rights (CHR) miingon nga dako g’yud kaayo kining paglapas sa tawhanong katungod ug nakalapas bisan mismo sa Republic Act 9165, kun Comprehensive Dangerous Drugs Act of 2002. Gipahinumdoman sa CHR ang kapolisan ug bisan ang publiko nga ang Republic Act 9165 naglatid nga ang pagpahigayon og drug tests buhaton lang sa mga “government forensic laboratories or by any of the drug testing laboratories accredited and monitored by the (Department of Health) to safeguard the quality of test results.”

Ngano nga ingon man niini ang gipanghimo sa kapolisan? Wala ba diay sila masayod nga gi-violate na nila ang balaod nga maoy ilang gipangusgan karon sa pagpatuman? Dili ba bati paminawon nga sulbaron ang krimen o pakgangon ang krimen pinaagi sa pagbuhat usab og mas dakong krimen? Maayo lagi ang tumong, apan daotan ang pamaagi, wala gihapo’y pulos. Sa makausa pa, dili gusto ang katawhan sa ilegal nga drugas.

Wa’y ganahan niini, kondili, kadto ra g’yud mga nakakuwarta niini. Bisan gani ang mga drug users karong mga panahona nagpanghadlok na ug tingali ang uban nagmahay kon nganong nasulod sila niining bisyoha.