Pagdupa ni Paolo
Dili lang usa, kon dili, kaduha na duphi ni Presidente Rodrigo Duterte ang kamaguwangan niyang anak lalaki nga si Davao City Vice Mayor Paolo Duterte gikan sa mga pasangil nga apil kini sa smuggling ug ubang panguwarta sa Bureau of Customs (BOC):
Ang una atol sa iyang pakigpulong atubangan sa mga sakop sa Dragon Boat Team sa Philippine Air Force (PAF) nga iyang gidapit og panihapon sa Malakanyang niadtong Martes sa gabii; ug
Ang ikaduha atol sa inugurasyon sa planta sa solar panel sa Santo Tomas, Batangas niadtong Miyerkules sa hapon.
* * *
Mao ni ang unang dupa ni Presidente Duterte sa iyang anak: Gitaban sa 18-anyos nga si Paolo ang anak sa usa ka Tausug ug usa ka Maranao, ug kay wa may laing panginabuhi kinahanglan siya nga motrabaho sa pantalan para sa iyang asawa ug mga ugangan kansang negosyo mao ang pag-import og mga banga ug ukay-ukay.
Ang gipasabot sa presidente mao ang negosyo sa pamilya sa kanhi asawa ni Paolo nga si Lovelie Sangkola nga iyang gibuwagan 12 ka tuig na ang nilabay human sila nanganak og tulo.
* * *
Mao ni ang ikaduhang dupa sa presidente sa iyang kaugalingong mga pulong (nga gipangahasan nako og hubad ngadto sa Binisaya): “Kon mangutana lang mo, kanunay na si Paolo sa pantalan, nitabang sa iyang in-laws. Kay wa may panginabuhi. Kinahanglan siyang motrabaho para sa pamilya.
“Kon kanang mga jars, ukay-ukay, nga gipalusot sa iyang in-laws, kon smuggling na, hatagi ko og kuwentada ug mokanaog ko sa katungdanan. Wa na’y problema nako.”
* * *
Abogado si Presidente Duterte busa sayon ra tingali siya nga makasabot ning balaod nga mahimong nalapas nilang Paolo ug sa iyang kanhi asawa ug mga kanhi ugangan: Republic Act. No. 4653 nga nag-ulohan og “Act to safeguard the health of the Filipino people and maintain the dignity of the nation through the prohibition of the importation of used clothing and rags.
Apan dili makiangayon ang iyang hulga pag-resign. Igo na nga dili siya mobabag sa pagkiha ug pagsilot sa iyang anak. Gawas kon gigamit na ang iyang popularidad pagtabon sa kahiwian nga gipasangil batok ni Paolo ug ubang mga sakop sa iyang pamilya.
* * *
- Latest
