Bililhong katigayonan

Human sa dul-an sa tunga sa tuig nga kalangay, nadayon na g’yud ang among sabot sa pagsubay sa kagahapon sa Sugbo. Suod nakong higala, ganahan nga magpakisayod sa labing makahuloganon nga mga panghitabo sa downtown sa Dakbayan sa Sugbo. Samtang ang akong asawa gusto nga mobasa sa mga libro mahitungod sa iyang apohan.

Tungod sa mas dinalian ug nagkasungi nga mga lakaw, wa magkaabot ang among pundok hangtud gahapon sa buntag. Mao nga sa katapusan, amo na g’yud nga naduaw ang Cebuano Studies Center (CSC) sa University of San Carlos sa Barangay Talamban.

* * *

Apan dili g’yud diay sayon ang pagbugtaw og kinaadman. Kini bisan sa akong paneguro nga dili mabawo ang among lakaw. Sayo sa niaging semana, ako na nga gisusi kon unsa’y mga panginahanglan sa among lakaw.

Giingnan ko nga bisan nagsugod na ang USC Intramurals, abli ang library. Nahibaw-an sab nako nga nagkinahanglan mi og permiso una makasulod.

Namalihug ko sa higala nakong magtutudlo sa USC pagkuha sa among permiso. Apan gipasaligan siya nga wa na kinahanglana ang permiso kay igo na lang mi nga pangayoan og IDs. Tuod man, wa mi pasudla sa mga guwardiya kay wa mi permiso.

* * *

Dihang gihikay na ang among permiso, giingnan na sab ang mga guwardiya nga pasudlon mi bisan wa’y permiso. Apan wa matapos didto ang among mga pagsuway.

Bisan sa makuti nga giya sa mga guwardiya, nasaag mi sa pagtungas ug paglibot sa kabahin sa 80 ka ektarya nga luna sa USC sa Talamban, nga karon mao na ang giila nga main campus ug ang orihinal nga building gitawag na lang nga downtown campus.

* * *

Apan pagsulod na namo sa 1.6 ka ektarya ug walo ka andana nga Learning Resource Center, gigantihan mi sa lunsay nga kahinangop sa nagbuntaog nga kasayuran nga gibuksan alang sa among pundok.

Sa ikatulong andana, nga maoy nahimutangan sa Cebuano Studies Center, nalilian namo, dili lang ang karaang downtown ug inilang mga molupyo, apan apil na ang dakong tibhang nga nag-uwang sa mainland ug sa isla sa Kawit, sa wa pa ang South Road Properties (SRP) ug labing mabulukong tinabanay ug labing duguong mga patay nga moribal sa bag-ong mga eskandalo.

Karon nga nakatultol ug nakasuway na, nabalaka ko nga magsige na mi og balikbalik.

* * *

([email protected])