EDITORYAL - Naunsa na ni?

Tinuod nga daghan na g’yud nga mga durugista sa nasud, apan ang makapahibulong mao nga bisan sa kadaghan na sa nangadakpan ug napatay, wala man gihapon mapuo kining problemaha. Ang nakapaalarma kay imbes nga mogamay, mas nagkadaghan na man hinuon ang drugas nga nangasakmit, ug may mga bag-o na nga nisulod sa ilegal nga negosyo ug mas nangisog pa hinuon.

Ngano nga kaniadto wala man manukol ang mga drug suspects, ug karon nga unta “ligas-paka” na ang sitwasyon, manukol na hinuon? Tulo ka adlaw na ang nakalabay, kapin 50 ka tawo ang napatay didto sa Bulacan ug Manila sa giingong police operations kontra ilegal nga drugas. Ang mga napatay nisukol kuno sa mga polis, apan lahi ang estorya sa mga tawo, ilabi na sa mga kabanay.

Dili pa lang dugay didto sa Caloocan City, adunay 17-anyos nga estudyante sa Grade 11 nga napatay sa tulo ka polis kay kuno nisukol sab. Ang tulo ka polis nangangkon nga pagkakita kanila sa estudyante, kalit kini nga mibunot og armas ug gipusil sila mao nga ila kining gibawsan ug napatay. Nakuhaan kuno nila ang tinun-an og 45 kalibre nga pistola ug pinaketeng shabu.

Pwerteng danguyngoy sa amahan ug nangayo’g hustisya para sa anak nga wala g’yud niya mapanalipdi gikan sa sakit kaayong kamatayon nga dili siya makatoo. Gihulagway niya nga tarong ug seryuso sa pag-eskuyla ang iyang anak kay nangandoy kini nga mahimong polis.  Nagsul-ob ra kini og purol nga luag ang garter ug T-shirt nga pambalay. Maayo na lang nga mibarug ang mga silingan ug mitestigo nga nakapalig-on sa footage sa CCTV cameras nga dili tinuod ang pangangkon sa mga polis.

Giimbestigahan karon ang tulo ka polis, apan bisan og mapriso pa sila sa tibuok nilang kinabuhi, dili na mabalik pa ang kinabuhi sa bata. Nag-apas ba ang tulo ka polis og insentibo?, medalya?, promosyon? O basin tungod sa pressure nga may agi sila batok sa drugas matag semana?