Sugbo luwas sa bird flu

Mitiyabaw intawon ang mga nagnegosyo og poultry products dinhi sa Sugbo, ilabi na sa karneng manok, gumikan kay wala na may mopalit sa ilang baligya sa  kamerkadohan.

Kini tungod sa kahadlok sa bird flu outbreak didto sa Pampanga nga liboan na ka manok ang gipamatay aron dili na mokatap ang virus.

Giklaro sa Bureau of Animal Industry (BAI) sa Department of Agriculture nga bird flu free, o wala’y bird flu dinhi sa Kabisay-an, partikular na sa Sugbo.

Nagpasabot kini nga luwas pa ang mga poultry products nga gipamaligya sa atong kamerkadohan.

Bisan pa man niini mipatuman og total ban ang Bureau of Animal Industry sa mga poultry product gikan sa Luzon, lakip na ang transhipment o mga produkto gikan sa Mindanao ug silingang rehiyon sa Visayas, nga giagi sa Manila usa dad-a dinhi sa Sugbo.

Gitutokan karon sa mga sakop sa Veterinary Quarantine Services sa Mactan ang tanang kargamento aron maseguro nga wala’y makalusot nga poultry product nga magdala og dakong kadaot sa atong dapit.

Gawas sa poultry product gikan sa kaulohan, gi-monitor usab karon ang mga migratory birds sa Olango Island nga posibleng magdala og sakit.

Gani gi-reactivate sa Lapu-Lapu City ang Taskforce bird flu aron maseguro nga pabiling luwas sa sakit, dili lang ang isla, kon dili, ang tibuok rehiyon.

Aron dili na kini mokatap pa ang bird flu, kinahanglan nga motuman na lang ang tanan sa protocol nga gipatuman karon sa ahensya sa kagamhanan.