Hari sa karsada, wala’y disiplina

Sa kahagip-ot sa mga karsada, maghuot g’yud ang mga sakyanan ilabi na karon nga hilabihan na kadaghan sa mga sakyanan.

Apan dili lang ang kagamay sa karsada ang hinungdan sa grabeng problema sa kahuot sa trapiko, kondili, ang pagka wala’y disiplina mismo sa mga drayber.

Sama sa sitwasyon sa mga karsada sa dakbayan sa Lapu-Lapu, diin kada adlaw nako masaksihan ang pagka wala’y disiplina sa mga drayber sa multicab, puwera sa maayo.

Mopasakay ug mopakanaog sa mga pasahero mismo sa tunga sa karsada, sama sa karsada gikan sa merkado padulong sa Cordova, ug vice versa.

Duha ka “lane” ra ang karsada sa mga interior portion sa Lapu-Lapu mao nga mababoy g’yud ang mga sakyanan kay dili man makaabante kon naay multicab nga magpatuyang lang nga mura’g sila na ang hari sa karsada.

Usa kini sa bantayan sa mga enforcers sa CTMS, kay kon matagad lang g’yud kini, makuha-kuhaan tingali ang kahuot sa mga sakyanan, ilabi na sa peak hours.

Sama sa dakbayan sa Mandaue nga estrikto g’yud nila nga gipatuman ang No Stopping sa mga karsada, aron dili makamugna og problema sa trapiko.

Ang mga badlungong hari sa karsada nadisiplina kay silotan man g’yud nila.

Kon nahimo kini sa TEAM sa Mandaue City, mahimo usab kini sa CTMS sa Lapu-Lapu City. Apan alang sa mga mabuot nga drivers, dili na unta sila maghulat nga badlungon sa mga traffic enforcer, sila na unta ang modisiplina sa ilang kaugalingon alang sa tawhay nga dagan sa mga sakyanan.