Dalaygong asawa

Kanunay g’yud ko nga makadungog sa radyo DYKC nga adunay usa ka edaran na nga babaye nga maghilak ug magpatabang sa mga tigpaminaw aron siya makapalit og tambal alang sa masakiton niyang bana nga anaa na sa ngilit sa kamatayon.

Giantos sa maong babaye ang kauwaw. Ang tinuod, dili sayon ang gihimo sa maong babaye nga magpangayo og tabang gikan sa mga tawo, nga dili gani niya kaila.

Dili gani imposible nga ang uban magduda pa nga iya kining modus sa panguwarta.

Apan kon imo gyud nga hinuktokan pag-ayo, ang gihimo sa maong babaye, usa ka kinaiya nga angay’ng panaminan sa ubang mga asawa, o kaha bana, nga matinud-anon kaayo sa ilang mga kapikas.

Dako nga masakiton ang iyang bana, apan bisan pa niini, ingnon gani siya sa iyang bana nga dili na magpakauwaw sa pagpangayo og tabang, kay paabuton na lang niya nga siya mamatay. Magkinahanglan na og kanunay’ng dialysis ang bana sa maong babaye.

Sa ato pa, kinahanglan sila kanunay og kuwarta aron nga kalugwayan ang kinabuhi sa bana sa maong babaye.

Probinsiyano ang maong babaye ug gitamod g’yud niya ang ilang gipanumpaan ug sa iyang bana, nga kamatayon ra ang makauwang kanila.

Diha ko nga mibati og kalooy sa maong babaye. Bisan gani ang program anchor sa DYKC nga si higalang Bob Malazarte, gibati usab og dili matukib nga kalooy. Swerte si Bob kay dato man, usahay makatunol siya og kuwarta sa babaye.

Gusto unta ko nga motabang, apan ang akong kakabus maoy nagpugong nga dili makahatag og hinabang sa maong babaye.

Makaingon ko nga sulondon ang gihimo sa maong babaye, kay ang ubang babaye mobiya sa ilang kapikas kon masakiton na, ug wala’y kuwarta.

Padayon Manang sa imong pagpaningkamot nga kalugwayan pa ang mga adlaw sa imong kapikas dinhi sa kalibutan.

Unta, daghan pa nga mga kuwartahan nga motabang kanimo.

Ang nakanindot niining maong babaye kay kon makapalit na siya og tambal para sa iyang bana, mobalik gyud siya sa estasyon sa radyo, ug magpasalamat sa mga mitabang kaniya.

Nakadayeg sab ko sa mga mitabang sa maong babaye kay wala gayud magpasiatab, wala magpaila.

Kana maoy tinuod gyud nga pagtabang nga wala na magpaabot nga isibya pa sa kahanginan ang ilang mga ngalan.

Nadani ko sa pagtuki niining maong isyu kay ang ubang asawa, basta wala na’y kuwarta ang ilang mga bana, mangita dayon og mga lalaki nga kuwartahan.