Limitan g’yud

Nindot bitaw nga butangan og limit ang pag-angkon og motorsiklo nga gamiton sa pagpamasahero, kana ba nga gitawag og “habal-habal.” Si Konsehal Joey Daluz III misugyot nga idili g’yud nga ang usa ka tawo makaparehistro og subra sa usa ka motorsiklo.

Gusto ni Konsehal Daluz nga kinahanglang walay tawo nga magnegosyo og habal-habal pinaagi sa pagpalit og daghang motor ug iyang paabangan ni bisan kinsa. Sa ato pa, kinahanglan nga kadtong magparehistro og motor nga gamitong habal-habal ug mag-operate dinhi sa dakbayan sa Sugbo, ang tag-iya g’yud sa motor.

Kinahanglan nga ang moparehistro, may lisensya gikan sa Land Transportation Office (LTO). Nindot kining sugyot ni Daluz kay kon patuyangan gud, daghan kaayong mga kuwartahan nga mopalit og motor, unya paabangan aron gamiton isip “habal-habal.” Apan ang pangutana, unsa may buhaton niadtong dili motuman?

Akong napanglantawan nga kining maong ordinansa wala gihapo’y kapuslanan. Mahiuban kini sa daghan kaayong mga ordinansa diha nga giabug-abogan na lang ug wala ipatuman.

Kinsa man gud ang mangusog sa pagdakop sa mga drayber og habal-habal nga gisuportahan man kini ni Mayor Tomas Osmeña.

* * *

Abi nako og ipasar na sa Cebu City Council ang ordinansa nga magtugot sa mga traffic enforcer pagsakmit sa driver’s license sa mga masalaypong drayber dinhi sa Dakbayan sa Sugbo. 

Gusto gyud diay ni Konsehal Jun Gabuya nga mohatag usa og legal opinion ang City Legal Office (CLO) nga isuporta niya sa gisugyot niya nga ordinansa nga anaa na sa final deliberation.

Pagka nindot kon matugotan na ang mga traffic enforcers nga makasakmit og lisensya sa mga masalaypong drayber. Dili man tingali angay’ng mahadlok ang mga tarong nga drayber kay dili man sila madakpan.

Kadtong moreklamo mao ang mga abusadong drayber nga kanunay’ng molapas sa balaod sa tukma nga pagmaneho og sakyanan. Ikaduha, dili angay’ng kahadlokan ang multa sa ordinansa kay gagmay ra man ang kantidad. Aw hinoon, dunay multa sa ordinansa nga may dako kay sa balaod sa LTO. Sama sa pag-drive og motor nga walay helmet, P1,500 ra ang multa sa LTO, apan kon ang ordinansa sa Dakbayan sa Sugbo ang basehan, P2 mil ang multa.

Tingali, kon sundon kini sa ubang mga local government units, sama sa Mandaue, Lapu-Lapu, Talisay,  “magkinto” gyud ang mga drayber. Ang gipasabot nako nga magmatngon sila nga dili makasala.

Para kanako, angay kini nga suportahan. Kadtong mokuwestiyon niining maong ordinansa, kuwestiyona didto sa korte.