Walay sense of emergency

Niadtong unang adlaw sa search and retrieval operation sa lawas ni Bien Unido Mayor Gisela Boniel sa kadagatan sa Caubian Island dakbayan sa Lapu-Lapu nagbinugtong lang nga ahensya ang Philippine National Police ang nagpahigayon.

Asa man ang Philippine Coast Guard? Kini ang akong gipangutana sa PNP official. Matud niya nga kapila na ka higayon nag-coordinate sila sa Coast Guard apan wala kunoy magamit nga kahimanan, walay masakyan.

Ang gihimo sa kapolisan nihangyo kini sa duha ka mga civilian divers nga maoy nisalom sa dagat aron ugkaton ang lawas sa mayor.

Tungod kay gabii gipahigayon ang unang retrieval operation ug duha ka tangke nga gamit sa mga divers wala gyud mosalir negatibo ang resulta.

Apan dili kini ang isyu, tungod kay wala gyud nakaresponde ang Coast Guard. Nakaingon ko nga dili gyud diay madalidali sila sa pag- responde bisan og ang dakong opisyal na sa PNP ang naghangyo kanila tungod kay wala silay magamit nga kahimanan.

Pastilan kon nahitabo pa nga emergency kaayo ug buhi pa ang tawo nga nagkinahanglan nga luwason sigurado gyud nga mamatay tungod kay dili man madalidali sa pagresponde ang ahensya nga maoy frontliner sa kadagatan.

Mao kini ang pait nga kamatuoran nga wala diay sense of urgency and emergency ang guardians of the sea.

Nakig- coordinate sab ang PNP sa Navy wala gihapon moresponde.

Wala man mosulti ang opisyal sa PNP sa ilang kadismaya niadtong panahona apan dayag kaayo sa panagway ang frustration nga wala gyud moabot ang katambayayong unta sa kadagatan.

Sa sunod nga adlaw na nagpadala og mga divers ang coast guard ug ubang ahensya sa retrieval operation.